amalinks wokungena

Breaking News

UHopewell Chin'ono Walelwa Ukuba Ahlawule Isibambiso seBail


UHopewell Chon'ono uvalelwa entilongweni

Umthethwandaba kamantshi eHarare ngoLwesine walele intathelizindaba elodumo, uHopewell Chin’ono, imvumo yokuthi ahlawule isibambiso sebail, esithi ulakho ukudala amanye amacala.

UChin’ono ubotshwe ngeviki edluleyo esetheswa icala lokuphazamisa sokwephula umthetho phezu kombiko awuloba enkundleni yeTwitter, yena evele elelinye icala alibotshelwa kunyanga ezedluleyo elokutshotshozela udlakela enkundleni efanayo.

UChin’ono ubikwa ebhale enkundleni yeTwitter ukuba uhulumende wayezavumela uHenrietta Rushwaya ukuhlawula isibambiso sebail, yena ebotshelwe ukutholakala elegolide enkundleni yendizamtshina ayefuna ukuliphumisa elizweni okungekho emthethweni.

Igqwetha lakhe, uMnu Douglas Coltart, utshele intathelizindaba ukuba bethuswe yisinqumo somthethwandaba ngoba imvumo yokubhadala ibail kulilungelo lomuntu wonke ekusisekelo sombuso.

Uqhubeke esithi isizatho esiphiwe lidale esokuthi uChin’ono ulakho okubaleka kasiliqiniso ngoba evele elelinye icala elikhulu kodwa kazange ebaleke lapho ephiwe imvumno yokuhlawula ibail.

Uqhubeke esithi kusobala ukuba uhulumende ulwisana loChin’ono ngenxa yokuzimisela kwakhe ukulwisana le nkohlakalo esithi bazakusa udaba lolu emthethwandaba waphezulu owe High Court.

“Ngokubona kwethu, uChin’ono uhlukunyezelwa umsebenzi wakhe wokuba yintathelizindaba. Lokhu sikubone ngecala aletheswayo ukuba bakwenza lokhu ngenxa yokuba uyintathelizindaba, lokuba ubhala ngenkohlakalo.”

Umtshutshisi utshele umthethwandaba ukuba uChin’ono ulakho ukuphambanisa abafakazi bakahulumende nxa engaphiwa imvumo yokuhlawula ibail, kodwa kazange atsho ukuba abafakazi labo ngobani.

Esipha isinqumo sakhe umantshi uthe amapholisa kumele atsho ukuba abafakazi bakahulumende ngobani esithi kakumelanga babophe umuntu bengakaqedi ukuhluzisisa udaba.

Kodwa okumangalise abanengi yikuba idale lithe uChin’ono ulakho ukuqhubeka edala amacala ngoba esebenzisa inkundla ye Twitter kakhulu.

UMantshi Marehwanazvo Gofa, ulaye uChin’ono ukuthi aphindele edale ukuzothonisiswa leli cala mhlaka 26 wayonale inyanga.

UChin’ono ukhangelelwe ukuphindela emthethwandaba mhlaka 7 Mpalakazi ezothonisiswa icala lokutshotshozela udlakela. Kuthiwa waloba enkundleni yokuxhumana eyeTwitter ekhuthaza abantu ukuthi batshengisele emigwaqweni besola umbuso kaMongameli Emmerson Mnangagwa.

Facebook Forum

XS
SM
MD
LG