amalinks wokungena

Breaking News

Umculi Odume Kakhulu Ngezomdumo weJazz uHugh Masekela Kasekho


UHugh Masekela uhlabela edolobheni le New Orleans ngomnyaka ka2006 kwele Melika.

Umculi obe dume okwamagama emhlabeni jikelele wakwele South Africa kwezomdumo weJazz, uHugh Masekela, akasekho.

UHugh Masikela ubhubhe ngoLwesibili kwesinye isibhedlela esise Johannesburg ngemva kokulwisana lomkhuhlane wemvukuzane okwesikhathi eside.

Lumculi, owaqala ukutshaya amachacho eleminyaka elitshumi lane waduma umhlaba wonke, waba nguthandiwe kwabamhlophe labansundu ikakhulu ngemva kokuba iSouth Africa isithole uzibuse.

Isizalwane seZimbabwe njalo engumculi kuqembu laMavevane Accapela uFuture Ndex Moyo uthi uMasilela ngumculi abebemhlonipha okumangalisayo.

“Sithanda lathi ukudlulisa ukukhathazeka kakhulu ngokulahleka kwakhe sihlanganyela lomdeni wakhe, sisithi makalale ngokuthula. Uyidlalile indima enkulu. Banengi kakhulu abafunde kuye. Nathi loba sisenza umculo ohlukene nalowu akade ewenza kodwake sifunde okuningi kakhulu.”

Kantike omunye umculi wakweleSouth Africa osacathulayo kwezomdumo kaMaskandi, uMaguzu, uthi alehlanga elingehlile.

“Silahlekelwe kakhulu akulahlekelwanga umdeni kuphela kodwake izwe lonke lilahlekelwe engathi umphefumlo wakhe ungaphumula ngokuthula. Uyohlala ekhunjulwa njalo. Izwenje lilahlekelwe kakhulu ngokudlula kweqhawe elaba yingxenye yomzabalazo wempi yenkululeko eSouth Africa.”

UMasekela ubeseleminyaka ephezu kwamatshumi ayisikhombisa (78). Ezinye zengoma zakhe ezike zadla ubhedu zigoqela u Stimela, Soweto blues lo bring him back home, lapho ayecula khona ngomuyi uNelson Mandela ngesikhathi ebotshiwe.

Inhlanganiso yezabaculu kwele South Africa ithi umuyi ngumuntu owasebenzisa kakhulu umculo njengesikhali sokulwa impi yenkululeko.

Umongameli Zuma laye usechaze umuyi njengomculi womhlaba jikelele obeyingcitshi kwezokuvuthela ichacho kanye lomlweli omkhulu wempi yenkululeko.

Kantike inengi labeZimbabwe lithi ingoma zakhe ezifana lo Khawuleza, Thanayi, Strawberries, uChileshe lezinye, zizahlala zikhwabitheka okweminyaka eminengi omuyi engasekho.

UHugh Masekela Kasekho
please wait
Embed

No media source currently available

0:00 0:04:46 0:00

Facebook Forum

XS
SM
MD
LG