amalinks wokungena

Breaking News

I-Botswana Yengezelela iState of Emergency Ngenyanga Eziyisithupha


Umongameli Mokgweetsi Masisi weleBotswana (Mqondsisi Dube/VOA)

EleBotswana selengezelele uhlelo lwe State of Emergency ngenyanga eziyisithupha, kusiyafika kuMbimbitho womnyaka ozayo. Lokhu kutsho ukuthi okufana lemngcele kuzaqhubeka kusavaliwe okwakhathesi, okuyizindaba ezingamnandi kwabanye abeZimbabwe abahlala kweleBotswana abasebelesikhathi bengaboni izihlobo labangani.

Umongameli Mokgweetsi Masisi wakweleBotswana uthi bekuqakathekile ukuthi ilizwe lakhe lengezelele uhlelo lweState of Emergency ngenyanga eziyisithupha.

UMasisi, ekhuluma edale lephalamende ngoMvulo, uthi umkhuhlane weCOVID-19 uqhubeka umemetheka ngokunjalo kulesidingo sokuthi kubelendlela yokulwisana lawo.

Uthi eminye imithetho ekhona iyasilela ekunikezeni inkokheli yakhe amandla okulwisana leCOVID-19.

“Isisindo sokumemetheka komkhuhlane sesikhule kakhulu, ngalokho, ngizacela idale lephalamende ukuthi liyengezelele uhlelo lweState of Emergency ngenyanga eziyisithupha.”

AbeZimbabwe kweleBotswana, abafana lonkosikazi Patience Dube-Nleya, bathi sesiside isikhathi bengenelisi ukuyabona izihlobo. Ukwengezelelwa kweState of Emergency, kutsho imngcele izahlala isikhathi ivaliwe ngesikhathi amazwe anjenge South Africa eseqale ukuyekethisa kwezokuhamba.

“Thina esiphandle esingekho ekhaya, inengi sihlezi abantwana baseZimbabwe kumbe eSouth Africa. Sisabalele asibonani isikhathi esinengi, siyehluleka ukuthi sichaphe imngcele siyebonana kuhle.”

Abaphila ngokuthenga kumbe bethengisa phandle kwelizwe abafana lomnunzana Rodwell Moyo bathi kuzabalukhuni uma umngcele uqhubeka uvaliwe.

“Umkhuhlane lo usilimazile kakhulu, njalo sesizwa ubuhlungu ukuzwa ukuthi eleBotswana selengeze ngenyanga eziyisithupha. Siphila kweleBotswana, lezimali esizitholayo sizithola eBotswana. Imuli zethu ziphila ngeBotswana.”

Inengi kweleZimbabwe, ikakhulu eliseduze lomgncele leBotswana, belivame ukungena ukuzathenga imphahla yokuyathengisa ekhaya.Kodwa ngenxa yokuqhamuka lokumemetheka komkhuhlane weCOVID-19, impilo isiguqukile kumuli ezinengi.

Ngemva kokusungula kahle ilabantu abalutshwana abalomkhuhlane weCOVID-19, eleBotswana selibone inani liqonga emavikini asanda kwedlula, sekulabantu abaphose befike inkulungwane ezinthathu ababanjwe belalomkhuhlane.

Facebook Forum

XS
SM
MD
LG