amalinks wokungena

Breaking News

I-Bulawayo City council Yethula Iziqondiso Zokuphathwa Kwababulewe yiCovid-19


Bulawayo City Council

Ikhansili yedolobho lakoBulawayo isiyethule iziqondiso zokuthwalwa kwezidumbu ezivela kwamanye amazwe laseZimbabwe zababulewe yiCovid-19.

Lokhu kwenziwa kulandela ukukhonona kwabantu enkhundleni zokuxhumana ezebulenjini lapho abathwalwa izidumbu ezisuka kweleSouth Africa becalwa ngokuhlanganisa ukudla lezinye impahla lamabhokisi athwele abafileyo.

Inengi labantu likhathazekile eZimbabwe ngemibiko ephume enkundleni zokuxhumana ezebulenjini ezehlukeneyo besola indlela ephathwa ngayo izidumbu, impahla lokudla okuza ezweni kuvela kwamanye amazwe bethi kungabe kuyikho okubangela ukuqansa kwabantu ababanjwa igcikwane leCovid-19 edolobheni lakoBulawayo lona elihamba phambili ezweni kubantu ababanjwa iCovid-19.

Olwela amalungelo oluntu, uNkosikazi Patricia Tshabalala usole isenzo sokuhlanganisa ukudla, impahla lezidumbu ezivela kweleSouth Africa.

“Kubi lokhu okwenzakalayo mntanami okwenziwa ngabatshayeli abavela kweleSA abathwala ukudla, impahla kuhlangene lezidumbu. Khangela ukuba inani lababanjwa iCovid-19 seliqanse njani emhlubulweni wakithi. Abakwenzayo lokho sekumele bajeziswe ngoba kubi kakhulu.”

Esinye njalo isakhamuzi sakoBulawayo, uNdodana Moyo uthi abazafunyanwa besephula umthetho kumele bajeziswe.

“Kuyadanisa ukuba lesehlakalo esinje, lokhu kungabangela ukuqansa kwenani Labantu abatholakala belomkhuhlane. Abezomvikela abakhweze amasokisi ngoba lokhu kuyabachaya ukuba izidumbu zidlulanjani zihlangene lokudla lempahla. Abazatholakala besenza ukungekho emthethweni sekumele bajeziswe.”

Kulandela ukukhathazeka kukazulu ngesehlakalo sokuthwalwa kwezidumbu kuhlangene lokudla lempahla, ikhansili yedolobho lakoBulawayo ikhuphe iziqondiso zokuphatha izidumbu zabantu ababulewe yiCovid ezisuka kwamanye amazwe lakuleli.

UDivisional Environment Health Officer kumaninsipala wakoBulawayo, uMnu Patrick Ncube uchasisa kabanzi ngalezi ziqondiso.

“Sekulabantu ababuya befake ukudla lempahla Phakathi kwama trailer abuya ethwele zidumbu ezisuk kwamanye amazwe njalo lokhu kuyadanisa. Uma kubelomuntu obhubhele phandle kwelizwe kulendlela ezilandelwayo njalo kulamankampani agcina lokuthwala abantu abafileyo kungakhathalekile ukuba babulewe yini. Uma kubelomuntu obulewe yiCovid kulendlela ezilandelwayo umuntu kabonwa njalo kulendlela thina esimbeka ngayo. Abantu abahlukane lokuhlanganisa impahla lokudla kumatrailer athwala izidumbu ngoba liyabe lingazi ukuthi umuntu ubulewe yini.”

Inani lababanjwa umkhuhlane weCOVID-19 lokhu liqansa okwethusayo edolobheni lakoBulawayo eliyilo eselikhokhela ukuba lenani eliphezulu elizweni jikelele labantu asebethe babanjwa lumkhuhlane lokulahkelwa ngumpefumulo.

Impahla ziqhubeka zingena ezweni ngendlela engekho emthethweni kuhlangene lezidumbu osokucatshangelwa ukuba yikho okumemethekisa umkhuhlane weCovid-19 koBulawayo.

Abathwala izidumbu ezisuka kwamanye amazwe bayalilandula icala abaletheswayo kodwa uzulu uthi ulabo ubufakazi balokho

Facebook Forum

XS
SM
MD
LG