Abazali abalabantwana abaphila lesimo esibangelwa yikuphazamiseka kwengqondo umntwana ezalwa, eseCerebral Palsy bakhala ngokuthi babhekana lobunzima ekunakekeleni laba abantwana osokubangela ukungahlalisani kuhle emulini, lokuchitheka kwemitshado kubizwana ngobuthakathi.
UNkosikazi Tracy Mabhiza okhokhela inhlanganiso elondoloza amalungelo abantwana abaphila lalesisimo uthi ngezikhathi ezinengi sicina sibangela ukungezwani emulini.
Ngokwanda kwabantu abadinga ukuphathiswa ngendlela ezitshiyeneyo kucina sokusinda inhlanganiso ezizimeleyo ezivame ukuphathisa abaswelayo lababhekane lobunzima empilweni.
Igqwetha elilwela amalungelo abakhubazekileyo uMnumzana Abraham Mateta uthi isikhathi sesiside loludaba lungalungiswanga ngoba uhulumende ehlala ekhala ngodubo lokusilela kwemali.
UDokotela Norman Matara omela inhlanganiso yabo dokotela abalondoloza amalungelo oluntu uthi balwela ukuba kwengezelelwe imali kwezempilakahle kulandelwa Isivumelwano sase Abuja esikhuthaza ukwabelwa kwesilinganiso sokulitshumi lanhlanu ekhulwini-15% sebudget yelizwe emsebenzini weze mpilakahle.
