amalinks wokungena

Breaking News

Econet Wireless: Uhulumende Uzama Ukusiqila Ngezithitshi Zikamakhalekhukwhini


Econet Wireless Zimbabwe

Inkampani yabomakhalekhukhwini eye Econet Wireless ithi imizamo kahulumende yokuthi isebenzelane lamanye amabhizimusi aquba imisebenzi efanayo eZimbabwe isebenzisa imitshina yayo ikhanya iyindlela yokufuna ukuyihluthunela imitshina yayo ngendlela engekho emthethweni sikhangela indlela limizamo ebuya ngayo.

Embikweni yayo kumaphephandaba i-Econet ithi kayiyali ukusebenzelana lamanye amankampani ayabe elemitshina yawo ezwayo elizweni engangena kuzivumelwano ezingaphathisa ukuthuthukisa ibhizimusi kumacele womabili hatshi ukutshelwa okokwenza nguhulumende.

Umnumzana Admire Zaya wenhlanganiso yezakhamuzi ze Chitungwiza uthi uhulumende ubemele azise ukusebenzelana okunje engakanikezi amabhizimusi abona ngokuhanjiswa kwemibiko ama licence:

Umnumzana John Dube oyisakhamuzi se Harare uthi uhulumende ukhanya engafuni ukuphuma egcekeni ukuze kubonakale ukuthembeka kwakhe kuloludaba ngoba amabhizimusi amele asebenze ngendlela ehleliweyo:

I-Econet embikweni wayo ithi noma yangena emsebenzini yabomakhalekhukhwini ngemva kokuba amanye amankampani abalisa i-Telecel le Net-one evele esesebenza, yasebenza kanzima yadinga imali endaweni ezinengi ezigoqela i-Stock Exchange ye Zimbabwe laku mali zama pension ezibalisa i-NSSA le Old Mutual yokuthenga imitshina yezithitshi zabonmakhalekhukhwini ezinengi esekusimo samatshumi athoba minwe mbili ekhulwini-80% yezithitshi zonke elizweni eZimbabwe okokuthi ukuyisebenzisa ngendlela engayisiyo kuzaphazamisa abantu laba abaku pension lamanye ama shareholders khona kungadingakali.

UZaya uthi okudingakalayo yikuba ibhizimusi ngalinye lizenzele okwamanje njalo nxa uhulumende efuna inguquko elungisise kakutsha.

I Econet ithi amanye amabhizimusi la kalayo imitshina eyifunayo lezithitshi, okutsho ukuba ukusebenzelana okuzaba khona kuyabe kuyiho athola usizo yona ingatholi lutho kiwo. Ithi sikhuluma nje yona yiyo yodwa kumankampan abomakhalekhukwhini esibhadale imali ye license yokusebenza efika ku $137.5 million dollars amanye engabhadalanga lutho.

Umphathintambo wemisebenzi yokukhulumisana ngemitshina yangalezi nsuku umnumzana Supa Mandiwanzira uphume ekhuluma ezindabeni izolo ukuba nxa i-Econet ingafuni ukusebenzisa imitshina yayo labanye kumele isuse yonke imitshina engabe ilayo endaweni ezifana lezindlu zikahulumende lendawo ezingaphansi kukahulumende ethi I econet yayifanele ifike emahofisini akhe yethule isikhalazo sayo.

XS
SM
MD
LG