amalinks wokungena

Breaking News

I-NRZ Ikhuthazwa Ukumisa Umsebenzi Ngenxa Yesimo Esibi Senjanji


NRZ

Inkampani kaloliwe eye National Railways of Zimbabwe isikhuthazwe ukumisa umsebenzi wokuthwala abantu ngenxa yesimo esibi senjanji ezweni lonke okubeka impilo zezihambi engozini enkulu.

Linkuthazo iza ngemva kokuwa kwesitimela ebesisiya eHarare sisuka koBulawayo ngoMgqibelo sithwele izihambi ezedlula ikhulu. Kulandela lesisehlakalo, isitimela esithwala uzulu sisiya eHarare simisiwe kodwa umgcinisihlalo wenkampani le uthi kumele kumiswe zonke izitimela ezithwala uzulu ngenxa yomumo wenjanji elizweni.

Umnumzana Alvord Mabhena, uthi uloliwe kenzi mali eyangaphi ekuthwaleni uzulu kungakho ukumisa lezizitimela kusadingwa imali yokulungisa injanji kungaba licebo elihle lokuphephisa impilo zezihambi. Uthi lokhu kuyabe kungaqali ngeZimbabwe ngoba iBotswana kanye leMozambique kulesikhathi ezathengisa izitimela lapho kungaselamali yokuzilungisa kanye lenjanji.

Umfundisi Useni Sibanda, owake wasebenzela inhlanganiso yokuvikela amalungelo oluntu, uthi ukumisa izitimela lezi kungemukeleka ngoba ukusigada isitimela sokufana lokudlala umdlalo womjaho wamabhiza ngempilo yakho ngoba ungazi ukuthi uzafinyelela lapho oyakhona. Ngakhoke uthi kuyadingeka ukuthi uhulumende alethe imali ezalungisa injanji lezi kanye lokunye okudingakalayo ukuze abantu bahambe bevikelekile ezitimeleni lezi.

Umsekeli kamongameli wenhlanganiso emele abatshayeli bezitimela, iRailway Association of Enginemen, uMnumzana Julien Manyere uthi inkampani le idlala ngempilo zabantu, ikakhulu abasebenza ukuzihambisa ngoba imitshina edingakalayo kanye lenjanji kungasela. Uthi zinengi ingozi ezanzakala kololiwe inengi elingaziwa nguzulu ngoba kuyabe kuyizitimela ezithwala impahla.

UNkosikazi Resta Nkomo, ongumongikazi, uthi injanji lezi ziyingozi okwethusayo ngoba ilizwe alilazo izibhedlela kumbe imitshina edingakalayo kuma fire brigade okulakho ukusiza impilo zabantu lapho kuthe kwaba lengozi yesitimela kwalimala abantu abanengi. Uthi lo ngumaquphula uhulumende ahlezi phezu kwawo ethule ongadubuka yiloba yisiphi isikhathi ngakhoke kumele kuthathwe isinqumo masinya ukuthi kwenziweni ngololiwe.

INRZ ibikwa idinga amadola angaba yizigidi ezingamakhulu amane -$400 million ukulungisa injanji elizweni lonke ukuze kusetshenzwe ngendlela. Kusenjalo izisebenzi zakololiwe ezilenyanga zingabhadalwa ngendlela zinikwe imvumo ngumthethwandaba waphezulu ukuthi zitshengisele zisola ukungabhadalwa kwazo.

XS
SM
MD
LG