amalinks wokungena

Breaking News

I-South Africa Iqala Uhlelo Lokuhlolisisa AmaPermit Abokuza


SAF Work Visa

Uhulumende weSouth Africa usekhethe ikomiti ezahlolisisa zonke incwadi zokuba selizweni eziphiwe izizalwane zakwamanye amazwe okugoqela abeZimbabwe, kusukela ngo 2004. Likomiti ekhethwe lugatsha lwendaba zasekhaya kweleSouth Africa isihle yaqala lumsebenzi.

Umphathintambo wogatsha lwendaba zasekhaya umnumnzana Aaron Motsoaledi uthi lokhu bakwenze ngemva kokunanzelela ukuthi sezizinengi izehlakalo esezivele obala zabantu abalencwadi lezi ezisemthethweni kodwa abazithola ngudlu.

Uthe amapermit azahlolisiswa la abalisa amaPermanent Resident Permits, Corporate Visas, Business Visas, Critical Skills Visas, Retires Persons Visas, Citizenship by Naturalisation Visas lama Study Visas.

Uthi likomiti iphiwe inyanga ezintathu ukuthi yethule umbiko wayo wakuqala ngalokhu eyabe isikwenzile.

“Iziphathamandla ezikhiphe amapermit lawa ngudlu lalabo abawathole ngudlu bonke bazawukhomba olotshwala.”

Lobanje kweleSouth Africa bebanengi abeZimbabwe abaselizweni ngokungekho emthethweni, banengi njalo abangene elizweni besebenzisa amapermits la abaliweyo.

Umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi bayayemukela lihlolisiso, njalo bakhuthaza ukuthi kungahlukunyezwa labo abalencwadi abazithole ngokusemthethweni.

“Siyakwazi ukuthi kulabantu abafika ku200,000 abathola amaspecial permit. Labo bantu abakho phakathi kwaloluphenyo. Yikho sicela ukuthi abantu bengethuki. Kodwake labo abathola amapermit ngendlela engekho emthethweni mhlawumbe abanye ababhadala izimali kuzikhulu zemnyango wangaphakathi kuzokwenzeka ukuthi amapermit lawo adatshulwe. Kungenzeka futhi ukuthi abantu abanjalo bengasavunyelwa ukuthi ba aplayele amapermit.”

Isikhulumeli senkosi yakwaMthwakazi uBulelani Lobhengula Khumalo umnumnzana Bornman Khumalo uthi baphakathi kokuhlela umhlangano lomqondisi wogatsha lwendaba zasekhaya befuna ukuzwisisa kabanzi ngaloluhlelo ngoba sekukanengi kutholakala ukuthi inhlolisiso ezinengi zalolugatsha zicina sezingathi zihlose ukuzingela abantu beZimbabwe.

“Asikwazi ukuthi kanti impi leyo isingeyani ngoba thina indlela esiphethwe ngakhona sekungathi singamaforeigner okwedlula amaforeigner. Kanti obaba mkhulu balilwela leli lizwe. Ukuthi abelungu bafaka kuphi iborder, hayi asifuni kuzingelwa sengathi kukhona esikutshontshileyo hayi. Ungezwa kuthiwa kukhona olunye ucingo luyafakwa khonale eBeitbridge. Sifuna kesibuze ukuthi kanti kwenze njani.”

Abanye balensolo yokuthi kuzathiwani ngemali ezakhitshwa yilabo abathola lezi incwadi ngudlu ngoba phela bazithola kuziphathamandla zogatsha lwendaba zasekhaya. Inengi lamapermit ensithala ahlawulelwa imali ephakathi kweR10,000 kusiya ku R15,000.

Kodwake lolugatsha luthi ababhadala lezo mali babesazi ukuthi bephula umthetho.

please wait

No media source currently available

0:00 0:03:12 0:00

Facebook Forum

XS
SM
MD
LG