amalinks wokungena

Breaking News

I-Tuli-Makwe Irrigation Scheme Isilunxiwa Ngenxa Yokuswelakala Kwamagetsi


ITuli-Makwe Irrigation isungulwe ngomnyaka ka1963 njalo eminyakeni eyedluleyo bekulinywa khona umumbu, ingqoloyi, indumba, imbhida kanye lamatamatisi

Indawo yokulima ngokuthelezela eye Tuli-Makwe Irrigation Scheme eseMatabeleland South isiphenduke yaba lunxiwa ngenxa yokuswelakala komlilo wamagetsi kulindawo osokubangele ukuthi labo abakade bephila ngokulima behlaselwe yindlala enkulu.

ITuli-Makwe Irrigation isungulwe ngomnyaka ka1963 njalo eminyakeni eyedluleyo ibiyisiphala seZansi yemaNdebeleni lapho obekulinywa khona umumbu, ingqoloyi, indumba, imbhida kanye lamatamatisi.

Indawo le ibisazakala njalo ngokuhlala iluhlaza tshoko ngezilimo ebezilinywa kulindawo kungela mkhawulo, kodwa lapho iStudio Seven evakatshele khona kuliviki ithole ukuthi akulalutho olulinyiweyo kulindawo njalo ucingo solufile okudala ukuthi izifuyo zingene kulinsimu.

IMakwe isilomnyaka ingelawo umlilo wamagetsi kulandela ukutshontshwa kwencingo okwadala ukuthi inkampani kagetsi isuse injini zayo kulindawo. Lanxa incingo zamagetsi sezabuyiselwa, injini kagetsi ilokhu ingekho, osekudale ukuthi kungasalinywa ngoba amanzi edonswa ngamandla kagetsi.

UNkosikazi Sheila Sibanda ongumgcinisihlalo wekhomidi yeTuli-Makwe Irrigation Scheme, uthi ukuswelakala kwamagetsi lokhu sekuphazamise inhlalakahle yabo.

Amazwi akhe asekelwe nguNkosikazi Sesulelo Moyo othi inengi lezakhamizi kulumango selibhekane lendlala embi ngenxa yokuswelakala kwamagetsi lokhu.

Ngaphandle kokusiza izakhamizi zeNqameni kuphela ukhansila kaWard 8 eMakwe uNkosikazi Rachel Ncube uthi iTuli-Makwe ibiyisiphala seZansi yemaNdebeleni ngoba umumbu obulinywa kulindawo ubuhanjiswa esiphaleni selizwe eseGrain Marketing Board GMB.

USobhuku weMswelamanzi uMnu Godwin Ncube udla amalahle ngodaba lokuswelakala kwamagetsi.

UMnu Sikhumbuzo Ndlovu, ongusomabhizimusi eMakwe, laye ukhala ezimathonsi ngokuswelakala kwamagetsi kulindawo.

Abemba igolide kulumango labo bakhala ngendleko zokuthenga amafutha okuvusa imitshina yabo esebenzisa ugetsi.

UMqondisi wenkampani kagetsi kulesisabelo umanjinela Lioyd Jaji uthi obekumise amagetsi eMakwe yikuswelakala kwamafutha enjini kagetsi ioil yetransformer kodwa uthi sebeyitholile njalo akusensuku zatshwala engakabuyiselwa amagetsi kulindawo.

Kusenjalo amapholisa asekhuthaze inkokheli zomdabu ukuba zibike lapho zibona izizalwane zakuleli ezifohla imngcele ngokungekho emthethweni zingena elizweni.

Isikhulumeli samapholisa eZansi yemaNdebeleni uChief Inspector Philisani Ndebele uqhube umhlangano eMakwe ngoLwesithathu.

Sebengamakhulu amathathu lamatshumi amahlanu lane – 354 asebetholakale belegciwane leCorona Virus kulesisabelo labulala umntwana oyedwa.

please wait
Embed

No media source currently available

0:00 0:06:06 0:00


XS
SM
MD
LG