Ugatsha lweMelika oluphathisa amazwe ngemali yenhlelo ezitsheyeneyo, eye United States Agency for International Development, kumbe USAID ngamafitshane, luthi alusekuphathisa inhlanganiso ezizimeleyo ze Zimbabwe ngoba bezitshaphaza imali.
I USAID yethule umbiko ichasisa ukuthi kungani ithehe lelo nyathelo.
Abe USAID bathi bekulokungaphathwa kuhle kwemali enhlanganisweni lezi abakade bezisekela.
Inhlanganiso ezitshelwe ngumpako zigoqela eye Election Resource Centre (ERC), Zimbabwe Human Rights (ZimRights), Counselling Service Unit (CSU) lezinye.
UMnu Discent Bajila owebandla eliphikisayo ele MDC ekhokhelwa nguMnu Welshman Ncube uthi inhlanganiso lezi bezisebenza umsebenzi omuhle kakhulu njalo kuzamele bazigeze emacaleni abawetheswayo ukuze basinde.
“Kuliqiniso ukuthi ukuswelakala kwemali losekelo kuzadala isikhala njalo ngelinye cele kuliqiniso ukuthi besekulobugwelegwele obuthile okade busenziwa. Kodwa kukho konke lokhu kuqakathekile ukuthi inhlanganiao lezi zizigeze kuhle zime ngeqiniso zenze okulungileyo,” kutsho uBajila.
uNyaradzo Ncube oyisifundi sakwelinye lamakolitshi eZimbabwe, uthi lobanje abe USAID bangabe bethole ubufakazi bokuthi imali bezingasetshenziswa ngendlela, bebetheni ukuthi bamelele ukhetho lwedlule baqhubeke ngenhlolisiso yokutshaphazwa kwemali, ukuze amalungelo kazulu alondolozeke.
“Ngalapha esiyakhona, kumaelections inhlanganiso ezibona ngamalungelo abantu kufuze babekhona. Ukuvalwa kwenhlanganiso esezivaliwe bekungabangcono ngabe kwenziwe sesivela kukhetho okuyikho lapho amalungelo abantu ahlukumezwa khona,” kutsho uNcube.
Egcizelela kulokhu, uMnu Thamsanqa Mhepo, oyisakhamizi seBudiriro uthe ukumiswa kosekelo lwalezi nhlanganiso kuzakwenza kube lula ukuba ibandla leZanu liqilibezele kukhetho.
“Inhlanganiso ezinjengaboCSU, ERC laboZimrights bezisenza umsebenzi omuhle kakhulu, besifundisa ngendaba zokhetho. Okutsho ukuthi ukuvalwa kwalezinhlanganiso kuzatshiya isikhala esikhulu ikakhulu sesisyakukhetho,” kutsho Mhepho.
Ohlaziya ngenhlakahle kazulu uMnu Obadiah Marufu yena uthi loba nje lezinhlanganiso kukhona ezikwenzayo, ezinengi zakhona kazincedisi uzulu ngokupheleleyo.
Kutsho uMarufu: “Okunye kwakhona vele akuzwisiseki, awubikwazi ukuthi kuyenza ngani. Ezinye inglanganiso vele azincedisi ngoba asemanengi njalo wonke ayabe esenza intonye. Abenhlanganiso lezi abakhulume le Studio 7 kodwa bala ukuthi amabizo abo aziwe bathe bona abatshontshanga mali kodwa behluleka ukulandela imithetho ye USAID yokugcinwa kwemali yoncedo.”
Abanye njalo ngabathi lokhu kungabe kukhomba ukuba ele Melika selifuna ukusebenza lohulumende we ZANU PF njengalokho osekusenziwa yi Bhilithani, kodwa i USAID embikweni we twitter iveze ukuba ayisoze ikhiphe imali enhlanganisweni ezizimeleyo kodwa ifuna abantu besebenzise imali le ngonanzelelo.