amalinks wokungena

Breaking News

I-Zimbabwe Ifaka Isicelo Sokubopha Izizalwane Zayo Ezaphephela eSouth Africa


Ingcitshi zezomthetho lezombusazwe zithi nxa iSouth Africa ingavuma isicelo seZimbabwe sokubuyiselwa ekhaya kwabathile ababengabaphathintambo lokhu kuzadala impi enkulu emthethwandaba phakathi kwabafunekayo laba lohulumende weZimbabwe.

Ingcitshi zithi iSouth Africa iyenelisa ukwemukela isicelo seZimbabwe lesi sokubuyisela ekhaya ngenkani ababengabaphathintambo laba okuthiwa batshiya bedale amacala.

Ngokutsho kwegqwetha lezamalungelo oluntu umnumnzana Zibusiso Ncube asikho isivumelwano se extradition treaty phakathi kweSouth Africa leZimbabwe esingenza ukuthi labo abadale amacala babotshwe babuyiselwe emuva ukuyathonisiswa. Kodwa uthi lokhu akwenqabeli iSouth Africa ukwemukela isicelo seZimbabwe.

“Lesisicelo sizakuya kuhulumende weSouth Africa, engasemukela sesisiya emthethwandaba sekusiyaphikiswana ngobufakazi.”

Iviyo lezabatshutshisi eZimbabwe iNational Prosecuting Authority selibhalelele iSouth Africa licela ukuthi kubuyiswe emuva ababengabaphathintambo umnumnzana Saviour Kasukuwere, Walter Mzembi lo Patrick Zhuwao ukuze bayethonisiswa eZimbabwe ngamacala abawadala besaseyiziphathamandla zikahulumende.

Umeli weZimbabwe kweleSouth Africa umnumnzana David Hamadziripi, yena ongathandanga ukuveza ukuthi lesi sicelo sesidluliselwe kuhulumende weSouth Africa loba hatshi, uthi yebo kayikho iextradition treaty kodwa ukhona omunye umthetho ongasetshenziswa endabeni ezinjalo.

“Amazwela womabili alesivumelwano seMutual Legal Assistance lapho ancedisana khona ukubamba labo abayabe bedale amacala eZimbabwe.”

Kodwake umnumnzana Ncube uthi lumthetho awungeke usetshenziswe ukubuyisela abathathu laba emuva ngoba ngowokuhlolisisa lokuthola ubufakazi hatshi ukubuyisela labo abafunekayo emuva.

UNcube uthi ukuze lesi sicelo sipheleliswe kuzafuze sethulwe ngumthethwandaba kanti abathintekayo laba balakho ukuphikisana laso kuze kuyefikiswana emthethwandaba wesisekelo sombuso.

Omunye wabafunwa nguhulumende weZimbabwe laba umnumnzana Walter Mzembi uthi kusobala ukuthi uMongameli Emmerson Mnangagwa ubafunela ukuthi baphikisana lendlela enza ngayo izinto hatshi ngoba kulamacala abawadalayo.

“Uhulumende weSouth Africa akufuzanga avume ukwethuselwa yilabo abaqhuba umbuso kantando kayiphikiswa.”

Ingcitshi kwezombusazwe umnumnzana Zenzo Moyo, uthi akaboni ukuthi lesi sicelo sizakwemukelwa.

“Kusobala ukuthi laba bantu babizwanje ukuthi babuyiselwe eZimbabwe hayi ukuthi bayebhekana lamacala enkohlakalo lokukhwabanisanje kuphela. Babafuna ukuthi bayebhekana lamacala, babafake amacala awezombangazwe, ipolitics. Kusenziwa yikuthi laba abathathu lokhe beqhubeka ukukhuluma kabi ngebandla leZanu pf.”

UMoyo uthi nxa singemukelwa lesisicelo sizafaka isithunzi sikahulumende weSouth Africa engozini.

“Ma bengabiselwa ngale bafike betheswe amacala ezombangazwe ilizwe leSouth Africa lizabhekwa kubi within iregion lasemhlabeni wonke jikelele ukuthi lilizwe elincedisa ilizwe leZimbabwe ukuthi lincindezele izizalwane zalelo lizwe. So, iSouth Africa iyabe ibe lesandla ekuncediseni ilizwe leZimbabwe ukuthi lincindezele izizalwane zalo.”

Umnumnzana Lunga Ngqengelele, oyisikhulumeli sikamphathintambo wogatsha lwendaba zobudlelwano beSouth Africa lamanye amazwe uthi udaba lokuthi kulalesi sicelo bacine ukuzwa ngalo kumaphephandaba.

Umongameli Mnangagwa usephumele egcekeni esithi ufuna ababengabaphathintambo laba babuyiselwe ekhaya bezojeziswa ngoba basebenza lezitha zelizwe.

IZimbabwe ike yazama ukubuyisela ekhaya ngenkani abathathu laba isebenzisa iviyo leInternational Criminal Police-Interpol kodwa umkhokheli wamapholisa umnumnzana Godwin Matanga uthi lokhu kwehlula.

Abanye abake bazanywa ukubuyiselwa emuva ngumnumnzana James makamba lomnumnzana Mutumwa Mawere kodwa lakho kwehlula. Kudaba lukamnumnzana Mawere uhulumende kwathiwa ethule ubufakazi bokuthi wakhupha imali elizweni ngokungekho methethweni kodwa behlula lobo bufakazi.

Ngo2010 amapholisa eZimbabwe lawe South Africa aphanana izibotshwa ngokungekho emthethweni lolodaba lwaze lwayafika emthethwandaba. Omunye walabo umnumnzana Witness mandeya wagangadwa ngamapholisa wafa kwathi umnumnzana Pritchard Tshuma wanyamalala.

Facebook Forum

XS
SM
MD
LG