amalinks wokungena

Breaking News

I-Zimbabwe Inanza Ilanga Labezomvikela EleDefence Forces Day


Zimbabwe Defence Forces Day. (Umfanekiso siwuphiwe ngabogatsha lukahulumende lwezokwethulwa kwemibiko)

UMongameli Emmerson Mnangagwa uncompetitive ibutho le Zimbabwe ngokuncedisana lohulumende wakhe kuhlelo lokuhlatshwa kwabantu ijekiseni eye Covid-19.

Ekhuluma emkhosini wokunanza usuku lokuqhakathekisa umsebenzi wabezomvikela olwe Defense Forces Day, uMnangagwa ukhuthaze abakubutho lamapholisa ukuba batshiyane lomkhuba wobugebengu ngesikhathi izehlakalo lezi zisanda elizweni.

Umongameli Emmerson Mnangagwa ngelanga leDefence Forces Day(Umfanekiso siwuphiwe ngabogatsha lukahulumende olubona ngokwethulwa kwemibiko)
Umongameli Emmerson Mnangagwa ngelanga leDefence Forces Day(Umfanekiso siwuphiwe ngabogatsha lukahulumende olubona ngokwethulwa kwemibiko)

UMongameli Mnangagwa uthi ubhubhane lwe Covid-19 soluphazamise kakhulu indlela uzulu we Zimbabwe aphila ngayo ikakhulu kwezomnotho esithi ukuhlatshwa kwabantu yiyo yodwa indlela yokuba ilizwe lisinde ebunzimeni elikilo okwamanje.

Lanxa ilizwe lingela mali abezomviela sebencedise kakhulu kuhlelo lokuhlatshwa kwabantu be Zimbabwe ijekiseni lokuzifikela kumkhuhlane we Covid-19.

“Uhulumende wami lani bebutho kasizose zidinwe ukulwisana lalu mkhuhlane. Sihambenalan lezinqumo zokuqakatheiksa ilizwe, ngibonga ababethutho ngokuvuma ukun edisa kusikahti se Covid. Lina abebutho selincedile ukulwisana lalumkhuhlane,”

Ngesikhathi izibhedlela ezinengi ilizweni zithwele nzima ukubhadala oDokotela labongi ngesikhathi se Covid-19 abebutho sebesize kakkhulu ngokuncedisa.

UMongameli kumnyaka odluleyo wabeka umsekeli wakhe uMnu Constantino Chiwenga yena owake waba kubutho ukuba ngumphathintambo wezempilakahle, encidiswa ngomunye njalo owayekubutho, uMnu John Mangwiro.

Ingcitshi kwezombusazwe uMnu Tjenesani Ntungakwa uthi uhulumende we Zimbabwe uthemba amasotsha ngoba eyiwo amncedisayo ukungena embusweni.

“Udaba lwabebutho aluqalanga namhlanje. Sinanzelele ukuba uhulumende uthembe amasotsha ngoba bangabantu abalwa impi yenkululeko bathola isifundo sokuba ilizwe kalithengiswa”

UMongameli Mnangagwa wengeze esithi amabutho eZimbabwe asencedise kakhulu ngesikhathi besakha izindlu zabantu abadilikelwa yizindlu, ezikolo lezibhedlela ngesikhathi sophepha luka Cyclone Idai eManicaland.

Lokhu kusekelwe ngu Mongameli we bandla le ZAPU uMnu Isaac Mabuka esithi abebutho kumele bancede hatshi ukuhlukumeza uzulu.

“Amabutho enza umsebenzi omkhulu kakhulu, ikakhulu ngesikhathi sekuthula Kumele bancedisa lapho okufanela bancedise khona ikakhulu ngezikhathi zezulu elikhulu hayi izinto zokuma emgwaqweni”

UMnu Baxter Magwizi yena owalwa impi yenkululeko uthi kungumlandu wabebutho ukuncedisa enhlelweni zentuthuko.

“Amasotsha akhona ukusebenza bevikela isizwe nge mibhobho lokugcina ukuthula kuleli lizwe ukuzwe lingahlaselwa ngamanye amazwe. Kumele bencedise njalo kweminye imisebenzi ehlukeneyo”

UMnu Mnangagwa uthe abebutho kumele batshiyane lomkhuba wokusebenzisa umbhobho ukuntshontshela uzulu osungumkhuba obhahileyo ngalezi nsuku e Zimbabwe.

Uphinde waphatha udaba lokuthunyelwa kwabebutho ukuyancedisa komakhelwane eMozambique.

“Ngesikhathi kuludlekela e Mozambique, uhulumende wami uhambisa abebutho abedlula amakhulu amathathu ukuze sivikela ilizwe elingu mngane wethu ele Mozambique”

Usuku lwe Defence forces lonyaka lonanzwe ngesikhathi abalwela amalungelo oluntu bekhonona ukuba abebutho bahlukumeza uzulu ikakhulu labo abangasekeli ibandla le ZANU PF.

Abebutho bayakulandula lokhu besithi benza umsebenzi wabo bengasekeli loba yiliphi icele.

Ngeviki edluleyo babe lesikhathi sokungena empakathini bencedisa kunhlelo ezehlukeneyo ezigoqela olokuhlaba abantu ijekiseni yokuzivikela emkhuhlaneni weCovid 19.

Facebook Forum

XS
SM
MD
LG