Uhlangothi olubona ngezamanzi olweZimbabwe National Water Authority Zinwa selufaka amaprepaid meters ematankeni aweGwanda okuzadala ukuthi ikhansili iqale ibhadalele amanzi kuZinwa phambilini kokuba atholwe yizakhamizi.
Lelinyathelo selitshiye izakhamizi zeGwanda zikhathazekile okwamagama ngoba lilakho ukudala inhlupho zokuthi zibhekane lodubo olukhulu lokusilela kwamanzi nxa ikhansili ingehluleka ukuwabhadalela ngaphambilini.
UManisipala weGwanda uthi iZinwa ikwenze lokhu ngundlu okuyinto engalunganga ngoba kuphazamise ukutholakala kwamanzi endaweni ezibalisa iJacaranda kanye leSpitzkop.
UKhansila uMnu Thulani Moyo ongumkhokheli wekomidi ebona ngezamanzi uthi iZinwa ithethe lelinyathelo ingabatshelanga.
“Bafaka amaprepaid meters ematankeni angemva kwemapholiseni, kulenkampani okuthiwa yiHillcrest Electrical Engineering abayibo abrazo installer amaprepaid meters beqhatshwe yiZinwa.”
Bekuphuma amanzi edamu ezimpompini zeGwanda kuvuka kuyikhisimusi uMoyo athi kudalwe yiZinwa kulandela ukufa komtshina okuhlambulula amanzi.
“Amanzi angcolile njalo kasitshelwanga ukuthi kwenzakalani , abanye abantu sebeginjiswa yizisu ngenxa yeZinwa eyenza izinto ingakhulumanga.Sesiprepaid okungangokuthi sezizabe sijuicer amanzi nxa ikhansili ingaphuza ukubhadala kutsho ukuthi iGwanda ingelamanzi.”
UNkosikazi Siduduzile Masilela ongumhlali weGwanda uthi iZinwa kumele itshiye umanisipala weGwanda aphathe udaba lwamanzi.
“Okuyisifiso sethu njengezakhamizi sicela ukuthi iPlant yamanzi ibiselwe ekhansilini njengesivumelwano sokuthi iplant sizayiphiwa thina njengezakhamizi silwe lekhansili esiyaziyo laba abeZinwa asibazi.”
Isikhulumeli seZinwa uNkosikazi Marjorie Munyonga uthembise ukuphendula imbuzo ngaloludaba okuyinto abelokhu engakayenzi ngesikhathi sisiya emoyeni.
Lonyaka ngoNtulikazi izakhamizi zeGwanda zihlale iviki yonke zingelamanzi ngemva kokuba iZinwa ivale amanzi ifuna umanisipala weGwanda abhadale isikwelede samanzi okubikwa sesedlula izigidi ezingamakhulu amabili zamadola akuleli.
