amalinks wokungena

Breaking News

IZPC Kariba Yiyo Esikhokhela Engalaneni Yemiklomelo kuCastle Premier Soccer League


Castle Lager PSL

Iqembu le ZPC Kariba yilo eselikhokhela engalaneni yemiklomelo esigabeni se Castle Premier Soccer League ngemva kwemidlalo yeviki yetshumi lathobamunwe munye.

Iqembu le ZPC Kariba lilemiklomelo engamatshumi amathathu lanhlanu (35) njalo lilingene ngemiklomelo lentshantshu zanyakenye esigabeni sePSL iqembu le Dynamos kodwa iZPC ihlezi phezulu ngoba ihlohle kanengi njalo isenelisa ukuvikela isango layo.

Kundawo yesithathu kuleqembu le CAPS United lona elilemiklomelo engamatshumi amathathu lantathu (33).

Iqembu ebelikhokhela phambilini kwemidlalo yangempelaviki ele Highlanders lihlezi kundawo yesine lilemiklomelo engamatshumi amathathu lambili (32).

IBosso bayethule esiqongweni ngemva kokunqotshwa kwayo yi Dynamos nge 1 ka nya emagumeni ngoMgqibelo okuyimpumela ecunule abalandeli baleliqembu kwaba lodlakela oludale ukuba umlandeli weqembu leHighlanders uThembinkosi Hloli elahlekelwe yimpilo yakhe ikanti abanye abalandeli balimele kwaphindwa kwatshaywa lezimota ekupheleni komdlalo.

Lumdlalo ubuphuma kumabonakude okutsho ukuba isimo somdlalo wenguqu kweleZimbabwe sitshaphazekile njalo iqembu le Highlanders lilakho ukujeziswa yinhlanganiso ye Premier Soccer League ngenxa yokungaziphathi kwabalandeli balo.

Kundawo yesihlanu kuleqembu le Hwange elilemiklomelo engamatshumi amathathu lona lilandelwa ngele FC Platinum elilemiklomelo engamatshumi amabili lathoba minwe mbili.

Iqembu le Buffaloes likundawo yesikhombisa lilemiklomelo engamatshumi amabili lesikhombisa kuthi ngaphansi kwalo kuleqembu le Chicken Inn elilemiklomelo engamatshumi amabili lane njalo lilingene ngemiklomelo lele Triangle.

Kundawo yetshumi kuleqembu le Chapungu elilemiklomelo engamatshumi amabili lantathu njalo lilingene ngemiklomelo le How Mine kanye le Black Rhinos.

Kundawo ezine zangaphansi kwengalane kule Shabanie Mine le Harare City ezilemiklomelo engamatshumi amabili lambili, iBantu Rovers ilemiklomelo elitshumi lesithupha kuthi iqembu le Chiredzi okuyilo elijeke amanye wonke lilemiklomelo elitshumi lanye.

Kolunye udaba olumayelana lomdlalo wenguqu imidlalo yeligi isisuke yahlala elizweni le South Africa njalo umgadli wase Zimbabwe uTendai Ndoro odlalela iqembu le Mpumalanga Black Aces abalitshumi lambili abayenelise ukulitshayela emambuleni.

UNdoro uhlohlele iqembu lakhe lapho lisiba ngutshiki lobhanqa lele Bloemfontein Celtic 1 ka 1.

Iqembu le Chippa United yilo elikhokhelayo engalaneni yemiklomelo ngemva kweviki yakuqala yemidlalo kodwa lilingene ngemiklomelo emithathu lamaqembu athi ele Moroka Swallows, Bivest Wits, ele Kaizer Chiefs kanye lele Polokwane City okuyiwo ayenelise ukunqoba emidlalweni yawo yakuqala.

Elizweni leNgilandi iqembu le Arsenal liphakamise inkezo ye Community Shield ngemva kokuba libhuqe ele Manchester City nge 3 ka nya ngeNsonto.

Imidlalo yeligi yaseNgilandi iqala ngeviki ezayo.

*******************************

Sikhangele umdlalo kakhilikithi;

Umdlali weqembu elimela ilizwe le Zimbabwe

uJohn Nyumbu usengene kuluhlu lwabadlali abenelise ukuthola ama wickets ambalwa emdlalweni wabo wakuqala beyingxenye yeqembu lesizwe ngemva kokuba ethethe ama wickets amathathu kungakayiwa hlaba ikhefu lemini ngosuku lwesithathu olomdlalo wohlobo lwe Test ophakathi kwe Zimbabwe le South Africa esigodlweni iHarare.

UNyumbu oleminyaka engamatshumi amabili lathoba munwe munye eyokuzalwa uthethe ama wickets abadlali abathi uAlviro Petersen, uFaf du Plesis kanye lo AB de Villiers.

Iqembu le Zimbabwe likhethe ukuqala ukutshaya ibhola ekuqaleni komdlalo ngoMgqibelo lathola ama runs ayi 256 ku innings yalo yakuqala okulinani elithokozisayo nxa kukhangelwa ukuba leliqembu lithwale nzima lidlala leqembu elingelandumela yokudlala umdlalo kakhilikithi ele Afghanistan ensukwini ezedluleyo.

Lumdlalo we Test ukhangelelwe ukufika emaphethelweni ngoLwesithathu kuthi ngemva kwalokho lawa maqembu azabhekisa amabombo koBulawayo lapho azangqikilana khona emidlalweni emithathu eyohlobo lwe One Day International.

XS
SM
MD
LG