amalinks wokungena

Breaking News

Ian Khama: Kuyajabulisa Kakhulu Ukuthi uMugabe Obhidlize iZimbabwe Usesukile Esikhundleni


UMongameli Ian Khama loMongameli Emmerson Mnangagwa.
UMongameli Ian Khama loMongameli Emmerson Mnangagwa.

UMongameli Ian Khama wakwele Botswana uthi kube kahle kakhulu ukuthi uMnu. Robert Mugabe utshiye umsebenzi ngenxa yokuthi ebesediliza ilizwe leZimbabwe.

UKhama utshele intathelizindaba yeVOA uPetty Clottey ukuthi uMugabe ubisele ilizwe lakhe emuva okumangalisayo kusukela ngesikhathi lithola uzibuse.

Uthe uMugabe ubesehlale esihlalweni sikamongameli okudlulisa amalawulo ngakho kuyancomeka ukuthi ibandla lakhe limcotshile kulandela ukuhluthuna intambo zombuso libutho.

“Uyabona ubesehlale esikhundleni okwesikhathi eside okwenza ukuthi ilizwe leZimbabwe libe sesimeni elikiso lamhlanje. Lokhu sokwenze abantu amanengi okumangalisayo basuke elizweni besiyaphandela imuli zabo kwamanye amazwe.”

Uphinde wathi uMugabe ubehlezi esikhundleni “ukwenzela ukuthi athole akufunayo engasanaki lokuthi wafakwa ngabantu esikhundleni.”

“Ubezimisele ukuthi abhidlize ilizwe lakhe esenza engani kaboni ukuthi kunengi okunakala kwele Zimbabwe. Ubefuna ukubusa kuphela engelandaba labantu.”

Uthi kuyamangalisa ukuthi uMugabe wethula umbiko wokuthi uzakwenzani ukwenzela ukulungisa eleZimbabwe ikanti-ke abantu bonke babekhangelele ukuthi uzasuka esihlalweni.

Uthi konke lokhu kutshengisela ukuthi wayengani kakwazi okwenzakala eZimbabwe.

“Ungalalela akwethula ngosuku loluyana okwakumele atshiye ngalo isikhundla uyabona ukuthi wayelahleke okumangalisayo ngokwenzakala eZimbabwe.”

Uthi ulethemba lokuthi eleZimbabwe lilakho ukuvuselelwe nxa uMnu. Emmerson Mnangagwa labanye abakhe bangakhanga ngemfaneli ukuthi abantu bemazweni bavule amafekithali kulelolizwe.

UKhama nguye yedwa kuzwekazi leAfrica owaziwa ngokuthi ubefuna ukuthi uMugabe asuke esihlalweni kungene omunye umuntu.

UMugabe ubemthethisa nxa engezwa ukuthi wethule umbiko wokuthi sokumele atshiye umsebenzi.

XS
SM
MD
LG