Ibandla leZanu PF lizakwenza umhlangano weNational Congress ngoMpalakazi lapho uMongameli Robert Mugabe azakhethwa kakhutsha ukukhokhela lelibandla abe esexotsha uMnu. Emmerson Mnangagwa ekubeni ngomunye wabasekeli bakhe.
Lelibandla belimele libe lomhlangano weNational Conference eGwanda kodwa ubikwa usuguqulwa usiba yiNational Congress lapho okukhethwa khona inkokheli yebandla entsha.
Abazi ngokwenzakalayo bathi idale leZanu PF Politburo livumelene ngoLwesithathu ukuthumela amaqula ezabelweni ukuyakuzwa imibono yabasekeli bebandla phezu kwaloludaba.
Obona ngokuqhutshwa kwenhlelo zalelibandla, uMnu. Ignatias Chombo, laye ukufakazile lokhu njalo wathi bazaphuma lesinqumo esipheleleyo ngeviki ezayo.
Abazi ngokwenzakalayo bathi icele leGeneration 40, lona elilwisana lelikaMnangagwa eleTeam Lacoste, yilo elifuna kwenziwe iExtra Ordinary Congress lapho uMugabe azathi esekhethiwe njalo abe esekhetha abasekeli bakhe kutsha.
Kulapho-ke azaxotsha khona uMnangagwa ekubeni ngumsekeli wakhe ngemva kokumxotsha njalo ekubeni ngumphathintambo wezemithetho ngoMvulo.
UMnu. Mbuso Siso, umsekeli wesikhulumeli sebandla leMDC elikhokhelwa nguMnu, Welshman Ncube, utshele iStudio 7 ukuthi ukulwisana okukubandla leZanu PF kuphazamisa kakhulu ukusebenza kukahulumende.
