UMnu. Lazarus Chikwera webandla eliphikisayo eleMalawi Congress Party (MCP) usenqobe obengumongameli wakwele Malawi, uMnu. Peter Mutharika, kukhetho lukamongameli olwenziwe ngoLwesibili.
IMalawi Electoral Commission ithi uChakwera uvotelwe ngabantu abafika 2.6 million kwathi uMutharika wavotelwa ngabantu ababedlula isigidi lengxenye – 1.7 million.
UChakwera, owayekhokhela amakholwa kubandla le Malawi Assemblies of God, ukhangelelwe ukuthi uzagcotshwa ukuba ngumongameli welizwe leli namuhla. Umsekeli wakhe nguMnu. Saulos Chilima, owayengumsekeli kaMutharika.
Abantu abedlula izigidi ezine – 4.4 million bavote kukhetho lolu.
Ibandla lika Mutharika eleDemocratic Progressive Party lithi kulabalandeli balo abatshaywe kabuhlungu ngabasekela uChakwera ngesikhathi kusenziwa ukhetho. Akukacaci ukuthi uMutharika ufisa ukwenzeni ngalokhu.
Ibandla lika Chakwera lake lakhokhelwa ngumuyi uHastings Kamuzu Banda, owabangumongameli wakuqala onsundu kwele Malawi. Wasuswa esikhundleni abantu bekhonona ngombuso wakhe wochuku.