Ibandla leMDC-T selixotshise amakhansila amathathu ebandla leMDC Alliance eKwekwe.
Amakhansila la abalisa uMeya walelidolobho uNkosikazi Angeline Kasipo, umsekeli wakhe uMelody Chingarande loWashington Moyo.
Ibandla leMDC-T lithi lixotshise abathathu laba ngoba bale ukusekela umkhokheli walo uMnu Douglas Mwonzora, yena osexotshise amakhansila eMDC Alliance amanengi kanye lamalunga ephalamende asekela uMnu Nelson Chamisa.
Le yinto esolwe kakhulu ngumsekeli wesikhulumeli seMDC Alliance uMnu Felix Magalela Mafa Sibanda esithi kutshengisa sobala ukuthi uMwonzora udla leZanu PF.
Kodwa isikhulumeli seMDC-T uMnu Witness Dube utshele iStudio 7 ukuthi kungamanga ukuthu basetshenziswa libandla elibusayo.
Obona ngokwethulwa kwemibiko kuZanu PF uMnu Tafadzwa Mugwadi laye ukulandule ukuthi basebenza leMDC-T. Wengeze wathi okwenzakalayo phakathi kwamacele eMDC la ngeyomndeni.