amalinks wokungena

Breaking News

Ibandla leZimbabwe People First Lethulwa Okusemthethweni


Unkosikazi Joice Mujuru esethula ibandla lakhe okusemthethweni eleZimbabwe People First eHarare emhlanganweni lentathelizindaba

Ibandla elitsha le Zimbabwe People First ( ZPF ), elibhaliswe kwabe Zimbabwe Electoral Commission ngenyanga edluleyo, lethulwe kuzulu okusemthethweni, emkhosini owenzelwe eMeikles Hotel eHarare, ongenwe ngamakhulu abalandeli abavele ezigabeni zonke zelizwe, ngendlela yokulungiselela umhlangano omkhulu wokukhetha inkokheli, ozakwenziwa kunsukwana ezilandelayo.

Unkosikazi Mujuru esethula ibandla leZimbabwe People First
Unkosikazi Mujuru esethula ibandla leZimbabwe People First

Amakhulu abantu abakade bebuthene pandle kwewetela ye Meikles, bebehlabela lokugiya behaya umkhokheli we ZPF, unkosikazi Joice Mujuru, ephuma emhlanganweni wakuqala lentathelizindaba, wokwethula ibandla lakhe kuzulu okusemthethweni.
Owake waba ngumsekeli kamongameli oxotshwe umsebenzi lasebandlani leZanu Pf ngo2014, utshele lumhlangano ukuba akayi kubuyela kilo noma kanjani. Wathi yena njengenkokheli engababopheli sikhwili labo abamphatha kubi esesekubandla leZanu Pf, kungasinto eletha inguquko elizweni.


"Abanye balabo bantu,engxenye bengazwisisi ukuba ngingubani. Bebekhuluma nje ngoba kuthiwe benze njalo.Ungambiza loba ukumbuza lowo muntu,ukuthi siqondane,ulakho ukwehluleka ukukukhula njalo lokho ayabe ekutshilo ngaphambilini. Ngiyazi ukuba abanye batsho lokho abakutshoyo,ngoba bedakiwe. Akubhadali muntu ukwenza kwalolohlobo,ukube lokhe kuphindwa ezinye izinto.Zinengi izinto eziqakathekileyo okumele kukhulunywe ngazo,ukuxoxisana ngakho,okungaphathisa ukuthuthukisa ilizwe. Abezombutho balomsebenzi omqoka,balomsebenzi omkhulu.Bangeke bakhuluma ngezombusazwe abakubutho njengalokho esikutshoyo kubandla lethu le People First".

Wengeza ethi akukho ukukhulumisana okukhona phakathi kwakhe labamanye amabandla, ethi kuyinto ayizwa kumaphephandaba.

Unkosikazi Joice Mujuru ekhuluma lentathelizindaba eHarare
Unkosikazi Joice Mujuru ekhuluma lentathelizindaba eHarare

"Uzwa kuthiwa unkosikazi Mujuru uhlangane lomnumzana Tsvangirayi,unkosikazi Mujuru udla ubhedu ngoba eyale isikhundla,unkosikazi Mujuru uthe.Angikaze ngangena umhlangano lomnumzana Tsvangirayi selokhu sehlukana ngesikhathi sohulumende womanyano, kuze kube lalamuhla lokhu.Njengokutsho kwami,kumazwi engiwethule ngaphambilini, thina kasali ukukhulumisana labalemibono efana leyethu".
Ukujabulele ukwethulwa kwalelibandla uzulu oze kulomkhosi okubalisa unkosazana Joice Moyo oze evela emzini weNkulumane koBulawayo elanda lumkhosi.
"Yes,ngithabile ukuthi at last,iZimbabwe isizathola ukukhululek.Lokhe esasikumelele sinc 1980,obaba sebezathola imisebenzi,ama investments sezabuya la.Hayi 2018 siyawina".
Ubelilunga le MDC ekhokhelwa ngumnumzana Morgan Tsvangirayi uMaMoyo, ethi kalizange lazifeza izithembiso zalo wakubona kufanele abe lilunga le ZPF.
"Hayi besimthwele sibili uTsvangirayi kodwa uyehluleka ukusifika lapho esasimele sifike khon.Kodwa ngomama,hayi sesizafika sibili".

Unkosazana Loveness Nyoni odabuka eLupane, Jotsholo ehlala e Victoria Falls uze laye ukuzazizwela ngezakhe, lelibandla le ZPF aselisekela, lisethulwa okusemthethweni.
"Ngiyathokoza ngomama, uyazi ngathi ngisizwa indaba le isethulelwa phezu kwembiza yami, ngahle ngayikhwezela yaba nkulu kakhulu. Ngokubana vele lapho okungelamama khona, into azilungi.Lapho okungela mama khona,into kazihambi.Kwaba lomhelo, kodwa ngibonga ukuthi umama ukuthi wama isibindi,njengeqhawe, uNkulunkulu wayelesizatho sokuthi engafeli empini, ngokubana wayezobuya ezokhulula okwesibili".
UMaNyoni uthi ulethemba lokuba kuzofezeka lokho okwayelwa empini njalo kwasusa umbuso wabelungu ngomnyaka ka 1980.
"Mina umtanami,i first born yami, ngamzala mhla ka 28,1980, ngisithi nguVote, lalamuhla uthiwa ngu Vote ibizo lakhe. Ngasengikhala ukuthi engakuvotelayo yikuyini,mina ngizala umntwana. Manje ngiyabona ukuthi uNkulunkulu usesenza i restoration eZimbabwe ngomama, uTeurai Ropa Mujuru".

Bezikhona inkokheli, zalelibandla, inengi lazo kungezaxotshwa ebandleni leZanu Pf, okubalisa umnumzana Rugare Gumbe, ongomunye wababizwa njengabadala abasungule lelibandla obebobobotheka kokuphela ukutshengisa ukusijabulela lesi sehlakalo.

"Hayi,into ihambe kuhle kakhulu,sekumele ukuthi abantu basebenze.Kubuye ukuthi abantu bangalwi.Those who win,those who have good ideas,they will succeed kodwa labo abangela good ideas,bazakwehluleka".

Bekungesifanayo lakumnumzana Lyton Mufundisi ovele esigabeni seMashonaland Central.
"Vele kuright, umama usebuyele, so hayi,sifuna ukuthi ama Investors abuye,abantu benze umsebenzi,kathesi akula musebenzi".

Abebandla leli bathi yikhona kuzokwenziwa umhlangano omkhulu we Convention, lapho kuzokhethwa khona inkokheli yalo.
Okwamanje, umsebenzi uqhutshwa liqula elisabambe izikhundla kusalindelwe umhlangano omkhulu le National Management Committee lisebenzelana lenkokheli yezigaba ama Provincial Coordinators.

Bekujatshulwa kuyimipululu lapho unkosikazi Mujuru ekhulumisana labalandeli phandle kwewetela, abekade belindele ukumbona esephuma kulomhlangano.

Ukwethulwa kwebandla leZimbabwe People First Okusemthethweni
please wait

No media source currently available

0:00 0:04:51 0:00
Lapho esitholakala khona

XS
SM
MD
LG