Ibhanga elikhulu lelizwe eleReserve Bank of Zimbabwe ngoLwesine liqalise ukunika amabhanga atshiyeneyo elizweni imali yamatshe okumele isetshenziswe nguzulu.
Isikhulumeli sebhanga leli, uMnu. Alson Mfiri, uthi imali le ekhandwe kwele South Africa njalo elesisindo sezigidi ezilitshumi zamadollar eMelika - $10 million, izanceda kakhulu ukuthi uzulu athole intshintshi.
Abantu makhaza kade bedubeka okumangalisayo ngokungatholi intshintshi endawenin ezinjengezitolo lemtshoveni.
UMfiri uthe kukhangelelwe ukuthi uzulu uzayithakazelela imali yamatshe le eyethulelwe amabhanga.
Sixoxe njalo loMnu. Samson Nhliziyo okhangelane lezemali emabhanga eZimbabwe othe abantu makhaza balelungelo lokuyitshintshisa imali le emabhanga lapho abazathla khona amadollar eMelika.
Okhangelane lenhlupho zikazulu ekuthengeni impahla, uNkosikazi Rosemary Siyachitema, wenhlanganiso yeConsumer Council of Zimbabwe ugcizelele esithi kumele uzulu ayamukele imali le.
Abathandabuza ngesisindo semali le bagoqela uMnu. Xolani Moyo wakoBulawayo othe imali le yethusa abantu abanengi.