Ngesikhathi uhulumende ethakazelela ilanga lokubambana kweZapu leZanu eleUnity Day mhlaka 22 kulinyanga, abenhlanganiso yeIbhetshu likazulu bathi bazafola koBulawayo bekhumbula labo ababulawa ngumbhuqazwe weGukurahundi.
Inhlanganiso le imema abantu ukuthi baphatheke kulumkhosi begqoke impahla ezimnyama.
Ithi ukufola lokhu kuzaqala esithombeni sikaJoshua Mqabuko Nkomo enzikini yedolobho kusiya eStanley Hall.
Mhlaka 22 kuMpalakazi ngomnyaka ka1987 kulapho uNkomo loRobert Mugabe abasayinelana khona isivumelwano esaqeda ukubulawa kwabantu beMatabeleland labeMidlands ngamabutho eFifth brigade.
Lumbhuqazwe wabulala abantu abedlula inkulungwane ezingamatshumi amabili, 20,000 ezabelweni zombili.
Isiphathamandla seIbhetshu Likazulu uMnu Mbuso Fuzwayo Fuzwayo ukuthi mhlka 22 lusuku lwenyembezi ebantwini abanengi, hatshi olokujabulela ukubambana kweZanu leZapu.
