Uhulumende weZimbabwe uthi njengoba engela mali izisebenzi zakhe kaziyi kuyithola i-bonus sikhathi sinye kusitsho ukuba zikhona ezizathola kuyonale inyanga ka Lwezi ezinye zithole ngemva kwalokho. Le yinto engajabulisanga ezinye inhlanganiso zezisebenzi ezigoqela ezababalisi ezithi lezi ngezinye zezinhlupho okumele uhulumende azilungisise ngesiphangi phangi ukuze kwenqatshelwe ukukhalalwa komsebenzi njengalokho okwenziwe ngodokotela.
Lokhu ngokunye kokuphume emhlanganweni ongenwe zinkokheli zenhlanganiso zababalisi ngemva kokukwenza isicelo sokubonana lomphathintambo wezisebenzi lenhlalakahle kazulu, umnumzana Nicholas Goche lamuhla ekuseni.
U Goche utshele iStudio Seven ukuba isiqokoqela salomhlangano bekuyikuba inkokheli zama union bezifuna ukuthola isiqiniseko sokuba bazakuthola na imali yama bonus kanye lokuthi zizaqalwa nini inkulumo phezu kweholo.
Kodwa ezinye zalezinkokheli okufana lokhokhela eyinye yenhlanganiso yababalisi eye Progressive Professional Teachers Union of Zimbabwe (PPTUZ), umnumzana Wilson Makanyaire, zitshengise ukungasuthisi ngalezo zithembiso ezenziwe ngumnumzana Goche kulomhlangano owenzelwe emahofisini akhe eHarare.
Lalezo zithembiso uhulumende ahlezi ezenza u Maknyaire uthi kumele zigcwaliswe hatshi ukuba kube yinkulumo nje sikhathi sonke nxa kungenwa imihlangano lenkokheli zenhlanganiso ezimela izisebenzi zika hulumende.
Lokhu kusekelwe ngokhokhela enye yenhlanganiso ezimela ababalisi,eye Progressive Teachers Union Zimbabwe ( PTUZ ),umnumzana Raymond Majongwe,otshengise ukukhathazeka phezu kokutholiswa kwezisebenzi zikahulumende imali ngesikhathi esitshiyeneyo.
Kuthi okhokhela eyinye njalo inhlanganiso yababalisi eye Zimbabwe Teachers Association ( ZIMTA ),umnumzana Sifiso Ndlovu uveze ukuba kuvunyelenwe kulomhlangano ukuthi izisebenzi zikahulumende zithole ama bonus ngezikhathi ezehlukeneyo kusitsho ukuba bakhona abazayithola kuyonale inyanga ka Lwezi kuthi abasalayo bayitholiswe ngenyanga ezayo kaMpalakazi. Uthi uhulumende utshengise ukuzimisela ukukhulumisana labo kundaba ezehlukeneyo okubalisa olweholo lwezisebenzi lokugcwaliswa kwezithembiso ahlezi ezenza ezifana lokutholisa izisebenzi izindlu.
UNdlovu uveze njalo ukuba kukhona bona njengesisebenzi abafisa ukuba kungeniswe lakho ku Budget okuzamele bayekwethula kumphathintambo wezemali lokuthuthukiswa komnotho.
Lezi nkokheli zikhuthaza uhulumende ukuba aphange alungisise okumele kulungiswe ngoba umnyaka usuphelile, kuthi kusiyangenwa kumnyaka ka 2015 sekukusibanga esiphezulu.
Zithi lezinkokheli kumele ikhuphuke imali yezisebenzi zikahulumende kwenze ohola imali ephansi atholiswe amakhulu phose amakhulu ayisikhombisa amadollar-US$680.
Leli liholo abathi balibone lilungile ngemva kokwenza inhlolisiso ebonisa ukuba zibiza malini indleko zomuntu ngenyanga.
Kunhlolisiso yange nyanga ethe yenziwa ngabe Consumer Council of Zimbabwe, kunyanga edluleyo kaMpandula, baveze ukuba imhuli yabantu abahlanu idinga imali efika phose amakhulu ayisithupha-US$592, ukuze yanelise ukulondoloza indleko zayo ngenyanga.