amalinks wokungena

Breaking News

IBulawayo City Isilihlezi Phezu Kwengalane Yemiklomelo kuSouthern Region Division One


Iqembu lenguqu eleBulawayo City

Uphele zingutshiki lobhanqa kungela qembu elenelise ukulitshayela emambuleni umdlalo obukhangelelwe ngabanengi abalandela umdlalo wenguqu esigabeni se Southern Region Division One Soccer League.

Phakathi kwamaqembu athi ele Talen Vision kanye lele Bulawayo City yikho lapho okukhangelelwe ukuba kungaphuma khona iqembu elizathola ilungelo elokuyadlala kusigaba se Premier Soccer League ngomnyaka ozayo lisuka kusigaba se Southern Region Division One.

Amaqembu lawa adibane NgoLwesihlanu emini enkundleni ye Luveve emdlalweni weviki lesikhombisa njalo kuze kwalamula unompembe kungela qembu elenelise ukulitshayela emambuleni.

Limpumela itshiye iqembu le Bulawayo City lihlezi phezu kwengalane lilemiklomelo elitshumi lanhlanu okulinani eliphethwe liqembu le CIWU lona elizavakatshela ele Moto Moto ngoMgqibelo.

Umqeqetshi weqembu le Bulawayo City uTry Ncube utshele intathelizindaba ukuba umdlalo wanamhlanje ubungekho lula.

"Bekuhlangene amadoda. Sizamile ngamandla ukuba sinqobe kodwa laba ebesidlala labo kade bekhona emdlalweni.Singathi nje sikhubekile kancane njengoba besifuna yonke yomithathu imiklomelo kodwa akula esingakwenza ngaphandle kokuthi sikhangele umdlalo olandelayo. Umklomelo owodwa esiwutholileyo awukho mubi kangako nxa kukhangelwa ukuba iqembu ebesidlala lalo ngelinye lamaqembu akhangelelwe ukuba lingenza kuhle lonyaka."

Umqeqetshi weqembu le Talen Vision uMkhuphali Masuku laye uveze ukudana ngokwehluleka kweqembu lakhe ukuthola imiklomelo emithathu.

Besikhangelele ukuthola imiklomelo emithathu kodwa sasesithola owodwa njalo sibuhlungu enhliziyweni zethu ngoba siwatholile amathuba ambalwa okokuthi ngabe elilodwa litshaye amanethi aluba sikhuluma okunye.
Njenge Talen Vision limpumela kayisisi ndawo kodwa siyabonga ukuba siwutholile umklomelo ngoba uzasinceda phambili.

Iqembu le Talen Vision lona lilemiklomelo elitshumi lane ngemva kwemidlalo eyisithupha.

Kweminye imidlalo ezadlalwa kuviki lesikhombisa kusigaba se ZIFA Southern Region Division One Soccer League kusasa ngoMgqibelo iqembu le Binga Pirates lizemukela ele Bosso 90 ngase Binga, iqembu le Mosi Rovers lizadlala lele Indlovu Iyanyathela ngase Chinotimba, iqembu le Ajax Hotspurs lizadibana lele Casmyn ngase Crescent ngehola letshumi lambili emini kuthi emini ngehola lesithathu kudlale iqembu le Arenel lele Toronto enkundleni efanayo, iqembu le Mainline lizangqikilana lele Makomo ngase Dingimuzi kuthi iqembu le Moto Moto lizadlala lele CIWU enkundleni ye Mpumalanga.
Iqembu le ZPC Hwange lizahlaba ikhefu kulimpelaviki.

Kolunye udaba olumayelana lomdlalo wenguqu imidlalo yesigaba se Castle Lager Premier Soccer League ingena kuviki yethoba munwe munye kulimpelaviki njalo amaqembu azadlala ngokulandelayo.

Imidlalo eyeCastle Lager Premier Soccer League.
Imidlalo eyeCastle Lager Premier Soccer League.

NgoMgqibelo iqembu le Chicken Inn lizemukela ele Black Rhinos ngase Luveve, iqembu le Herentals lizadlala lele Chapungu ngase National Sports Stadium, iqembu le Yadah lizatshayana lele FC Platinum ngase Rufaro kuthi iqembu le ZPC Kariba lizadlala lele Manica Diamonds ngase Nyamhunga.

NgeSonto iqembu le Triangle United lizadlala lele Bulawayo Chiefs, iqembu le Mushowani Stars lizadlala lele Harare City ngase National Sports Stadium, iqembu le Hwange lizemukela ele CAPS United ngase Colliery, iqembu le Dynamos lizadlala lele Ngezi Platinum ngase Rufaro kuthi iqembu le Highlanders lizangqikilana lele TelOne ngase Barbourfields.

Ezemidlalo siloJoseph Njanji
please wait

No media source currently available

0:00 0:02:24 0:00

Facebook Forum

XS
SM
MD
LG