Idale leSenate kwele Melika selipasise iziqondiso zomthetho weZimbabwe Democracy and Economic Recovery Act (ZIDERA) ezilenjongo yokuthi ilizwe leZimbabwe kumele liqhube ukhetho olubalulekileyo nxa lifuna ukuvuselela ubudlelwano phakathi kwamazwe womabili.
Umbiko lo wethulwe ngoLwesine ngabakhuthaza ukuthi kuguqulwe umthetho weZIDERA, uSenator Jeff Flake loSenator Chris Coons abakukhomithi yeSenate Foreign Relations, abasanda kwethekelela kwele Zimbabwe lapho abenza khona imihlangano embalwa loMongameli Emmerson Mnangagwa, amabandla aphikisayo lenhlanganiso ezizimele zodwa.
USenator Flake ukhangelelwe ukuthi uzabuyela kwele zimbabwe ukuyahlolisisa ukuqhutshwa kokhetho oluzakwenziwa ngomvulo.
Iziqondiso lezi ezipasiswe yiUnited States Senate, zikubeke sobala ukuthi nxa ilizwe leZimbabwe lifisa ukuvuselela ubudlelwano lelizwe leMelika, elafakela uMnu. Robert Mugabe labanye bakhe izijeziso zenotho, kumele liqhube ukhetho olubalulekileyo, njalo ababusayo bakhangelelwe ukuthi bazaqhubela intambo zombuso abazanqoba ngeviki ezayo.
UMnu. Joseph Tshuma, ilunga lebandla leZanu PF, uthi kukhangelelwe ukuthi iZimbabwe Electoral Commission izakwenza ukhetho oluzathakazelelwa ngabantu bonke kanye lohulumende weMelika lamanye amazwe.