Umthethwandaba weConstitutional Court ususolwe nguzulu ngesinqumo sawo esivimba izizalwane zeZimbabwe eziphandle kwelizwe ukuvota zisemazwini ezikuwo.
Idale leli linqume ngomnyaka ka2013 ukuthi abantu beZimbabwe abahlala kwamanye amazwe kabalalo ilungelo lokuvota bekulawo mazwe kukhetho lweZimbabwe.
Kodwa lelidale alisazange lapha izizatho zesinqumo salo.
Umahluli omkhulu uMnu. Luke Malaba uze wakwenza lokhu liviki lapho athe khona isizatho esikhulu ngesokuthi isisekelo sombuso kasibambi uhulumende ngamandla ukuvumele abantu abakwamanye amazwe ukuthi bavote bekulawo mazwe.
UMalaba wengeze wathi abahlala kwamanye amazwe nxa befuna ukuvota kumele babuyele ekhaya bayevota ngesikhathi sokhetho.
Le yinto esolwe kakhulu yinhlanganiso yezizalwane zeZimbabwe ezihlala kwele Melika iZimbabwe Diaspora Vote Campaign.
“Lokhu kuveza sobala ukuthi umthethwandaba weConstitutional Court awusebenzi uzimele. Isisekelo sombuso sicacile ekuthini zonke izizalwane zeZimbabwe zilelungelo lokuvota,” kutsho umgcinisihlalo wenhlanganiso le uMnu. Den Moyo.
