UMahluli Benjamin Chikowero ubeke eceleni isinqumo kusicelo sika Mayor Jacob Mafume we Harare, sokuthi aphiwe ithuba lokuhlawulela isibambiso seBail esithi ufuna isikhathi sokuthi ahluzisise loludaba.
Lokhu kuza ngemva kokuba amagqwetha amacele womabli ethule izizatho zawo kusiya ngecele abalimelayo ukuba kuyini abakucela kuJustice Chikowero phezu kwaloludaba.
U-Mafume ukhweze isicelo sokuba avunyelwe ukuhlawulela isibambiso seBail, emthethwandaba waphezulu oweHigh Court, mhla ka 23 Mpalakazi ngemva kokuba elincitshiwe emthethwandaba kaMantshi uNgoni Nduna esithi ulakho ukuqhubeka ephazamisa ukwahlulelwa kuhle kwaloludaba nxa engaphiwa imvumo yokuhlawulela iBail.
Igqwetha likaMafume umnumzana Tonderai Batasara ulandisa ngokwenzakale namhlanje.
“Lamuhla bekulusuku lokuzwa udaba obeluphakathi kukaMayor weHarare Jacob Mafume lohulumende. UMahluli uJustice Chikowero uzwe okwethulwe ngamacele womabili kuloludaba. Uhulumende yena usiphikisile lesicelo. Ngemva kokuba esezwe inhlangothi zonke kuloludaba, uMahluli usibeke eceleni isinqumo sakhe kusitsho ukuba uzosethula ngemva kokuhluzisisa konke okwethulwe kulo umthethwandaba.”
Amagqwetha kahulumende kuloludaba umnumzana Richard Chikosha lo Arthur Bosha bakhuthaza idale leHigh Court ukuba lingaze lasigenqula leso sinqumo esathathwa emthethwandaba kaMantshi ngoba sasiqondile, besithi ngoba elakho ukuphazamisa abafakazi uMafume nxa engavunyelwa ukuhlawulela imali yeBail uMafume.
Lanxa uJustice Chikowero engazange atsho ukuba uzokwethula nini isinqumo sakhe, igqwetha likaMafume lithi balethemba lokuba kuzokwenziwa maduzane nje.
Amalunga ebandla leMDC Alliance abekade besemthethwandaba lamuhla abagoqela umsekeli kanobhala obona ngezokhetho, uNkosazana Ellen Shiriyedenga aveze ukudana okukhulu ngesinqumo sikaMahluli.
“Ngoba vele lendaba yakhona vele kayiqondakali ukuthi kuhamba njani and besibona kuyinto elula ukuthi hayi, lamuhla uJudge ubezahlala phansi ahluzisise indaba njengoba amagqwetha ukuthi kade esithini, siphiwe iBail. But isimanga uJudge uphonguthi hayi, ufuna isikhathi esokuthi ahluzisise indaba leyi, khona ezaphenduka ezositshela ukuthi uyaphiwa iBail loba kaphiwa ”
Okubuhlungu unkosazana Shiriyedenga uthi uChikowero kazange atsho isikhathi azasithatha ukuhluza okwethulwe ngamagqwetha amacele womabili.
“Besikhangelele ukuthi sizaphiwa isikhathi ukuthi iBail yakhona, ukuthi ijudgement izaba khona njengoba kade kuyi Urgent Coaurt Application. So it means that its an indefinite decision and asazi ukuthi kozoba khona nini. Yinto ebuhlungu.”
Mhla ka 17 mpalakazi umthethwandaba kaMantshi uncitshe uMafume ithuba lokuhlawulela isibambiso seBail edabeni alwetheswayo lokuthi ubephazamisa ukuqhutshwa kophenyo ecaleni aletheswayo lenkohlakalo lapho okuthiwa watholisa udadewabo uRotina Mafume indawo yokwakha kanye lonobhala wenkampanini yakhe uRutendo Muvuti.
Kolunye njalo udaba, umthethwandaba weHigh Court uthi uzaluhluza kusasa udaba lwesinye isifundi sekolitshini le University of Zimbabwe, uAllan Moyo, yena obotshwe mhla ka 7 Mpalakazi labanye bakhe besetheswa icala lokutshotshozela uzulu ukuba atshengisele ngendlela elodlakela.
Lokhu kuvezwe nguMahluli uBenjamin Chikowero ngemva kokuba luphindele njalo emthethwandaba lamuhla ekunanzeleleni ukuba belususiwe kuluhlu lwezindaba obekumele zihluzwe ngoMvulo mhla ka 28 Mpalakazi.
Igqwetha lika Moyo, umnumzana Obey Shava, utshele umthethwandaba ukuba akala nkinga yokuba luhluzwe kusasa mhla ka 30 Mpalakazi njalo amaqgwetha kahulumende avumelene lakho lokho.
Lanxa abanye bakhe abotshwa labo abayisikhombisa bavunyelwa ukuba bahlawulele isibambiso seBail edale likaMantshi, uMoyo ulincitshiwe lelothuba usithi ulakho ukubaleka elizweni icala lakhe lingakapheli ukuhluzwa.
UMoyo labanye bakhe babikwa baya esilindweni samabhasi eseCopacabana eHarare mhla ka 3 Ntulikazi, ngenhloso yokukhuthaza uzulu ukuthi atshengisele efuna uMongameli Emmerson Mnangagwa, asuswe esihlalweni ngoba esehlulekile ukubusa ilizwe.