amalinks wokungena

Breaking News

Idale lePhalamende Lithi Selizasebenza Enkundleni Zebulenjini


UMlawuli wedale lephalamende, uMnu. Jacob Mudenda

Abedale lephalamende babika ukuba sebezasebenzisa inkundla zebulenjini ekwenzeni imisebenzi yonke yalelo dale ngenxa yokuqhamuka kweCovid-19. Lokhu kuphume emhlanganweni wemfundiso ngokusebenza kwaleli dale owenziwe ngamalunga alo labezindaba kanye labenhlanganiso ezizimeleyo zakoBulawayo, Matabeleland North leSouth.

Lumhlangano owenzelwe ehoteleni eyeRainbow, koBulawayo ngoLwesibili, ubujonge ukupha ulwazi abezindaba kanye labenhlanganiso ezizimeleyo zeMaNdebeleni ngokusebenza kwedale lephalamende emizameni yokubalimukisa ukuba bengasebenzisana njani labo ekubumbeni imithetho kanye lokulandelela ukusebenza kwedale.

Ekhuluma emhlananweni wemfundiso lo, uMlawuli wedale lephalamende, uMnu. Jacob Mudenda ukhuthaze abezindaba ukuba bengathathi cele ekuqhubeni umsebenzi.

“Kumele lilandelele ukuba idale lephalamende lisebenza kanjani njalo kulamahlandla amathathu iExecutive, iJudiciary leLegislature.”

Unkosikazi Nomansonto Nsunga umsekeli kamabhalane wedale leli uthi bakubone kuqakathekile ukuthi bazise uzulu ukuthi abamanga ukusebenza ngenxa yeCovid-19.

“Njengedale lephalamende besilapha koBulawayo ukuzofundisa iNtathelizindaba, inhlanganiso ezizimeleyo labafundisi ngendlela idale elisebenza ngakhona. Kulandela ukuqhamuka kweCovid-19 asimanga ukusebenza sesisebenzisa ubulembu ekuqhubeni imisebenzi yonke yedale lephalamende njalo lamalunga edale ayenelisa ukulandelela konke okwenzakala edale besebenzisa iZoom loba bekuphi kwendawo.”

Omunye wabakade bekhona emhlanganweni wemfundiso wanamhlanje, ngolwela amalungelo oluntu, uMnu Bekezela Maduma Fuzwayo osebenzela eseGwanda.

“Kuyabongeka ukuthi abauye azokhuluma lathi uvule amehlo abanengi kunengi ebesingakwazi kuhle baqhubeke befundisa ngokusebenza kwedale.”

Olwela amalungelo oluntu, osebenzela eseLupane, uMnu Vumani Ndlovu uthi kuqakathekile ukuthola ulwazi lokuba idale lephalmende lisebenza njani.

“Bekumqoka ukuba isikhulumi sedale lephalamende lehle lize ebantwini ukuzofundisa uZulu ngokusebenza kwedale ngoba kuqakathekile ukuba abantu bazwisise ukusebenza kwedale Kanye lokuthola ingcazelo engavamanga ukubakhona.”

UNkosazana Thando Gwinji olwela amalungelo oluntu wakoBulawayo laye ubonge ukuzehlisa kwedale lephalamende ngokuzoxoxisana labo ngokusebenza kwabo ezweni.

“Umhlangano ebesilawo loSpeaker of Parliament ubuqakathekile kakhulu ngoba benelisile ukusibonisa ukuba siphatheke njani njengeNtathelizindaba lenhlanganiso ezizimeleyo ekusebenzeni kwedale lephalamende.”

Umhlangano wemfundiso lo, owelanga elilodwa, oqale ekuseni, ngabo half past 8, ehoteleni eyeRainbow Towers, ungenwe ngamalunga edale lephalamende abezindaba, inkokheli yabenkolo ezehlukeneyo labenhlanganiso ezizimeleyo. Abakade bekhona babe lethuba lokuthola ulwazi olujulileyo ngokuthi lelidale lisebenza kanjani kanye lokuthi uzulu angaphathisa ngayiphi indlela.

Abedale leli bathi kunje baphakathi kokulungiselela ukuba lomabonakude lomsakazo ozasakaza imisebenzi yonke yedale lendaba eziyabe zihlaziywa kilo, okuyinto eyamukelwe ngenjabulo ngabakade bekhona besithi balethemba lokuthi konke okukhulunywe emhlanganweni lo, akusoze kuphelele emlonyeni kuphela njengazo zonke inhlelo lezithembiso zabezombusazwe lohulumende.

Udaba lomhlangano wemfundiso ngedale lephalamende siluphiwa nguAnnahstacia Ndlovu
please wait

No media source currently available

0:00 0:05:12 0:00

Facebook Forum

XS
SM
MD
LG