amalinks wokungena

Breaking News

Idale leSenate LaseZimbabwe Lipasise Umthetho oweConstitutional Amendment Bill Number 2


Idale lephalamende ele Senate laseZimbabwe lamukele inguquko ephasiswe edale laphansi ele House of Assembly, yomthetho wokuguqula isisekelo sombuso, phansi kweConstitutional Amendment Bill number 2.

Amalunga alelidale, angamatshumi ayisithupha lanhlanu, avote esekela linguquko kwaphikisa amalunga alitshumi kuphela awamabandla aphikisayo.

leli dale lilamalunga angamatshumi athobaminwemibili-80, abangamatshumi amathathu lanhlanu babo, bengabebandla elibusayo ele Zanu PF. Bekuvele kudingeka amalunga angamatshumi amahlanu lane ukuthi iBill ipasiswe kuleli dale.

Lokhu kutsho ukuba abavote besekela linguquko bagoqela abamabandla aphikisayo abalitshumi, abamela izinduna abalitshumi lathobaminwemibili labammela abakhubazekileyo ababili. Abahlanu babikwa bengabuyanga edale ngoLwesibili kuvotwa.

Umgcinisihlalo we MDC-T, uMnu. Morgan Komichi, utshele iStudio 7 ukuthi kulusizi ukuthi lanxa kade bevumelene njengamabandla aphikisayo ukuthi bazaphikisa ukupasiswa kwale i-Bill kube labanye abathethe inyathelo lokuvota belisekela. Ethi njalo bazahlala phansi lbehlaziya ukuba labo abavote bephambana lezibopho zebandla bazathathelwa manyathela bani.

Ekhuluma ngemva kokupasisa kwale iBill, umpathintambo wezemithetho uMnu. Ziyambi Ziyambi, ubonge kakhulu bonke abavote belisekela esithi njengohulumende bakubone ukuba bekulezikhexe kusisekelo sombuso esalotshwa ngomnyaka ka 2013. Ngakhoke linguquko izaphathisa endabeni ezithize ezigoqela ezombuso wezabelo oweDevolution ukuze uhulumende enelise ukuthuthukisa izigaba.

Inengi lenhlanganiso ezilwela amalungelo oluntu lamabandla aphikisayo bayayisola linguquko besithi obe kuvele kukhona kungcono kulalokho osekuvotelwe manje, njalo li Bill inikeza amandla amanengi kumongameli welizwe.

Kunje elinye igqwetha eliyingcwethi kwezesisekelo sombuso, uMnu. Nqobani Sithole owakhweza emithethwandaba udaba lokuthi imise ukuhlaziywa kodaba lokuguqulwa kwesisekelo sombuso edale lephalamende uthi umangele ukuba idale leSenate liqhubekele phambili livotela linguquko kusisekelo sombuso. Kodwa uthi uzaqhubekela phambili elwisana lokuthi isisekelo sombuso singaguqulwa ngokukhulumisana lokucebisana lamagqwetha akhe.

USithole, ukwheze loludaba emthethwandaba waphezulu welizwe oweConstitutional Court efuna ukuba umise ukuhlaziywa kweConstiutional Amendment Bill number 2, ngoba kwavele kwaphambaniseka ukuthi kuhlaziywe eyakuqala iConstitutional Amendment Bill number 1, lidale lephalamende.

Loba kunjalo, i-Bill le isimelele ukusainwa nguMongameli Emmerson Mnangagwa, alakho ukukwenza yiloba yisiphi isikhathi.

Facebook Forum

XS
SM
MD
LG