amalinks wokungena

Breaking News

Amanye Amabandla Aphikisayo Athi Kawangengi Kukhetho Lwama By-elections Oluzakwenziwa Lonyaka


UMnu. Herbert Chimuka, umkhokheli webandla leIdeas Party for Democracy. (Photo: Mlondolozi Ndlovu)

Kulamabandla ezombusazwe ambalwa athi akasoze ancintise kukhetho lwama by-elections oluqhutshwa mhlaka 26 Mbimbitho lonyaka esithi lokhu yikudlalisa imali njenboba kuzaqhutshwa ukhetho lwelizwe lonke ngomnyaka ozayo.

Amabandla la agoqela ele-Ideas Party for Democracy elisanda kubunjwa, ele National Constitutional Assembly, eleMthwakazi Republic Party lamanye.

Abebandla le Ideas Party for Democracy bathi ababoni kulinyathela elilokukhalipha ukuqhuba ukhetho ngalumnyaka ngoba sekuyisikhathi sokuba ilizwe lilungisele ukhetho luka 2023.

Ekhuluma le ntathelizindaba e Harare namhla uongameli webandla leli, uMnu. Herbert Chamuka, uthi kuyamangalisa ukuba kungani lolukhetho lungaqhutshwa khona ngo2020 ekuxotshweni kwamalunga edale lephalamende lamakhansila.

“Njengabandla leIPD asingeni kuma by elections ngoba sabona uMnu Mnangagwa loMwonzora behlangana e state house ngeviki edluleyo sicabanga ukuthi ludaba lokuqila ukhetho.”

Umsekeli womkhokheli weNCA, uNkosikazi Hingani Mnkandla, uthi labo njenge bandla abayi kuphatheka ngoba kungaphazamisa amalungiselelo okhetho luka 2023.

“Thina njenge NCA asiboni ama buy election eqakathekile. Sibona engani yikudlalisa imali zelizwe, ezibhedlela akulalutho, kungeni esingakubala esikukhangeleyo. Leyo mali ingasebenza lokhu.”

AbeZAPU bona bathi bazangena kukhetho ngoba abantu abasela bameli ngenxa yokuxotshwa kwamanye amalunga edale lephalamende. Lokhu kuchasiswe yisikhulumeli sebandla leli uMnu Msongelwa Ndlovu.

“Thina njenge ZAPU siyancintisa ngoba isisekelo sethu selizwe sithi abantu kumele bakhethe abammeli babo. Siyananzelela ukuba abantu abala bammeli ngenxa yezizatho ezinengi.”

Umgcinisihlalo weZANU PF koBulawayo, uMnu Munashe Mtutsa, uthi bazanqoba kukhetho olizayo.

“IZANU PF libandla labantu ama by elections abangelwe yikula kumabandla aphikisayo. Thina sizatshengisa abantu ukuba silibandla elihlelekileyo ngokunqoba njalo ukuthatha izikhundla lezi.”

Izikhundla zedale lephalamende zasala zingasela bantu ngemva kokuxotshwa kwamanye amalunga lokubhubha kwabanye.

Inengi lalezi zihlalo yilezo ezazingeze MDC Alliance ephalamende laku makhansili, abaxotshiswa yiMDC-T ekhokhelwa nguMnu. Douglas Mwonzora, yona eyaphiwa imvumo ukwenza njalo ngumthethwandaba waphezulu oweSupreme Court ngomanyaka ka 2020.

Embikweni munye wokwazisa ngelanga lokhetho kuviki edluleyo uMongameli uphinde wazisa njalo wabeka ilanga lika mhlaka 26 Zibandlela ukuba ngelokubhalisa kwabafuna ukuncintisa kulolokhetho edale leNomination Court.

Lolu khetho olwalumele lwenziwe ngomnyaka ka2020 lwadluliselwa phambili uhulumende esithi usaphatheke ngomsebenzi wokumelana lobhubhane lweCOVID-19.

Facebook Forum

XS
SM
MD
LG