amalinks wokungena

Abafuna Ukubhalisa Kugwalo Lokuvota Bahlaba Umkhosi Ngedola Elifunwa Yikhansili


Ababhalisa kugwalo lokuvota kumele baveza incwadi etshengisa ukuthi bahlala ngaphi.

Ikhansili yeGwanda ithi izaqhubekela phambili ihlawulisa izakhamizi idola elilodwa kulabo abafuna ubufakazi besiqiniseko salapho abahlala khona - iproof of residence - yona efunakalayo nxa umuntu esiyabhalisa ukuvota.

Lokhu kungenani lezikhalazo zezakhamizi zokuthi limali iyesulwe ukuze uzulu abhalise ngobunengi.

Inhlanganiso yezakhamizi zeGwanda ibika ukuba yabhalela umanisipala icela ukuba ayehlise linhlawulo isuka ku dola isiya kumasenti alitshumi ukuze lalabo abaswelayo benelise ukubhalisa ukuvota.

Uhlelo lolu lwenziwa yiZimbabwe Electoral Commission.
Uhlelo lolu lwenziwa yiZimbabwe Electoral Commission.

Kumpendulo ebhalwe ngumqondisi wenhlelo zekhansili (Town Clerk), UNkosazana Priscilla Nkala, uthi umanisipala akenelisi ukwehlisa inhlawulo ngoba yavunyelanwa lapho kuhlelwa ibudget yalonyaka kodwa waphanga wathi uzulu ulakho ukuthola lezincwadi kumakhansila emawadini abo kungela nhlawulo.

UNobhala wenhlanganiso yezakhamizi, uMnu. Bekezela Maduma Fuzwayo, uthi kunzima kuzulu ukuthi abone okhansila ngoba inengi lihlezi liphatheke kweminye imisebenzi njalo abanye bengabamabandla ezombusazwe abangawasekeliyo.

Ngakho-ke uFuzwayo uthi sebezathatha amanye amanyathelo ukubamba ngamandla ikhansili ukuthi yesule linhlawulo.

“Nxa igovernment yehlisa ukuthi abantu bengabhadaliswa izithupha lama birth certificates yona ikhansili iphitsheka isithi abantu bebhadale iproof of residence so sesiyidlulisela phambili kwabaphatha ukhetho ukuthi babone ukuthi into enjalo iphathwa njani ngoba asila amacommissioner of oaths lapha eGwanda. Engxenye abathetha amacala labalinde izibotshwa labo bayabhadalisa ukuthi abantu bayebhadala ekhansili. Akusebenzeki.”

Amabandla aphikisayo athi iZEC yenza santando lapho okubhaliswa khona abantu kugwalo lokuvota.
Amabandla aphikisayo athi iZEC yenza santando lapho okubhaliswa khona abantu kugwalo lokuvota.

UNkosazana Sichasisile Ndlovu, owenhlanganiso yeCommunity Youth Development Trust, labo abakhangela ngendlela uhlelo lokubhalisa ukuvota oluqhutshwa ngayo bathi okwenziwa ngumanisipala akukho emthethweni.

“Okokuqala into eyenziwa yikhansili ayivunyelwa ukuthi ithengisele abantu abavele bezihluphekela abathola nzima imali bebathengisele iproof of residence ngedola akukho emthethweni ngoba layo imali yakhona kayivezwanga kahle kubudget yekhansili …”

Okhulumela ibandla leMDC-T, uMnu. Ekem Moyo, uthi inyathelo likamanisipala leli lizavalela uzulu ukuthi abhalise ngobunengi.

“Lokhu yikuvimbela abantu ukuthi babhalise kugwalo lokuvota. Abantu kumele babekwazi ukuthi ukuvota lilungelo likabani lobani …”

Ikhomishini ebona ngokhetho eyeZimbabwe Electoral Commission layo ngeyinye esolwa kakhulu zinhlanganiso ezizimeleyo kanye lentathelizindaba ngenhlawulo efunakalayo kulabo abafuna ukukhangela ukuqhutshwa kokubhalisa ukuvota.

Kunjalo nje uhlelo lokubhalisela ukuvota luyaqhubeka endaweni ezitshiyeneyo kodwa balutshwana abantu ababhalisayo.

Ngaphandle kwengxaki ezimbalwa uzulu ahlangana lazo, abanye bathi kabalawo umdlandla wokubhalisa kanti abanye ngabathi kabalalwazo olupheleleyo.

Abasakhulayo, ikakhulu babikwa besilela kakhulu kuloluhlelo, kutsho umkhokheli wenhlanganiso yabatsha iEducation and Unemployment Youth Forum of Zimbabwe uMnu Zenzo Nyoni.

Facebook Forum

XS
SM
MD
LG