amalinks wokungena

Breaking News

Iqembu leDynamos Liyakhokhela Engalaneni Yemiklomelo eyePSL


Dynamos FC

Isimo sengalane ngemva kwemidlalo yeviki lesibili kusigaba se Premier Soccer League sikhomba ukuba amaqembu amabili athi ele Dynamos kanye le Caps United yiwo aqale kuhle kumncintiswano walonyaka.

Intshantshu zanyakenye iqembu le Dynamos yilo elihlezi phezu kwengalane lilemiklomelo eyisithupha okulinani elilingana leleqembu le Caps United elihlezi kundawo yesibili kodwa iDeMbare ihlezi phezulu ngoba ihlohle kanengi njalo futhi ingakahlohlwa.

Iqembu le Dynamos linqobe ele Chapungu nge 1 ka nya ngoMgqibelo kwathi ele Caps litshaye ele FC Platinum ngeSonto.

Endaweni yesithathu kuhlezi iqembu le Triangle lona elilemiklomelo emine njalo lilingene ngemiklomelo le ZPC Kariba kanye le How Mine ezihlezi ngaphansi kwalo engalaneni.

Iqembu le Harare City lihlezi kundawo yesithupha lilemiklomelo emithathu njalo lilingene ngemiklomelo lamanye amaqembu anqobe kanye athi ele Tsholotsho, ele Chicken Inn kanye lele Highlanders.

Iqembu le Bosso litshaye ele Tsholotsho nge 1 ka nya emagumeni kodwa iqembu le Tsholotsho loba lidliwe lidlale kuhle kakhulu njalo umqeqetshi walo uLizwe Sweswe utshele intatheli ukuba abafana bakhe basacathula kusigaba saphezulu.

Kundawo yetshumi kuleqembu le Dongo Sawmills lona elilomklomelo owodwa okulinani eliphethwe ngamaqembu athi ele FC Platinum, iFlame Lily, iHwahwa, iChapungu, iHwange kanye le Buffaloes okuyiyo ejeke amanye amaqembu ngaphansi kwengalane ngoba ihlohle kalutshwane yaphinda yahlohlwa kanengi.

..................................

Sikhangele umdlalo we rugby;

Iqembu elimela ilizwe kuhlobo lomdlalo we rugby odlalwa ngabadlali abayisikhombisa lehluleke kancane ukuba libe ngelinye lamaqembu aphatheka kuyo yonke imncintiswano ye International Rugby Board Sevens ngemva kokudliwa ku final nge 22 ka 19 ngele Russia emidlalweni eqhutshelwe eHong Kong ngempelaviki edluleyo.

Iqembu le Zimbabwe liqale kuhle umkhankaso walo kusibaya sika Group G ngokunqoba ele Guyana nge 36 ka nya lalandela ngokutshaya ele Tonga nge 41 ka nya kwathi emdlalweni walo owokucina wezibaya lanqotshwa ngele Spain nge 10 ka nya.

Kusigaba se quarter final iZimbabwe itshaye iBrazil nge 21 ka 14 yasidlulela kusigaba se semi-final lapho edibane njalo leqembu le Spain yaphindisela ukudliwa kusigaba sezibaya ngokunqoba nge 24 ka 14.

....................................

Iqembu elimela ilizwe le Australia emdlalweni kakhilikithi yilo eliphakamise inkezo yezizwe zomhlaba ngemva kokunqoba elikwenze ele New Zealand ngama wickets ayisikhombisa ngeSonto ekuseni.

Lokhu ngokwesihlanu ukuba iqembu le Australia liphakamise linkezo njalo lokhu likwenelise phambi kwabalandeli balo njengoba limidlalo ibiqoqwe yilo lelizwe leNew Zealand futhi le final yakhona idlalelwe khona eAustralia.

XS
SM
MD
LG