Iqembu lomdlalo wenguqu leli yilo njalo elimela ele Zimbabwe kumncintiswano wokudinga intshantshu zezwekazi lase Africa lonyaka oweCAF.
Leli liviki lesibili iqembu le FC Platinum lisedolobheni lako Bulawayo lapho elizilolonga likhona phambilini kokuphatheka kwalo kumncintiswano we CAF Champions League njalo ngoLwesine limeme intathelizindaba zemidlalo lethula abadlali balo abatsha.
Lababadlali bagoqela ababili abayizizalwane zakwamanye amazwe njalo laba ngabathi uShadreck Mayembe wakwele Zambia kanye lo Albert Eonde odabuka kwele Cameroon.
Abanye abadlali abatsha kuqembu le FC Platinum ngababalisa u Kelvin Madzongwe obedlalela iqembu le Bulawayo City, uJameson Mukombwe obedlala kuqembu le Black Rhinos, uRahman Kutsanzira obedlalela iqembu le Highlanders, uFarai Madhananga obedlalela iqembu le Harare City, uNever Tigere obedlalela iqembu le ZPC Kariba kanye lo Nigel Papias obekuqembu le Bantu Rovers.
UMadzongwe uthi ukuqhatshwa kuqembu le FC Platinum kuzamfundisa okunengi okutsha okungamphathisa ekudlaleni kwakhe ibhola.
Bengivele ngifuna ukubuya lapha ngizofunda izinto ezintsha njengoba lisazi iqembu le FC Platinum lilabadlali bezinga laphezulu abafana lo Rodwell Chinyengetere onguye odlale kuhle nyakenye kusigaba se PSL.
Kulethuba njalo elokubonwa ngabaqeqetshi beqembu lesizwe kumbe ukubonwa ngamaqembu awakwamanye amazwe.
Iqembu le FC Platinum lizadibana lentshantshu zakwele Angola ele Desportivo de Agosto kusigaba sakuqala esomncintiswano we CAF Champions League njalo umdlalo wakuqala uzadlalwa ngempelaviki kamhlaka 9 kusiya mhlaka 11 ngenyanga ka Nhlolanja.
UKutsanzira uthi uzimisele ukusebenza kanzima ukuze aphathise iqembu le FC Platinum ukuba liqhube kuhle kulumncintiswano.
Okuqakathekileyo yikuthi lami ngibophe ziqine njengoba simele ilizwe le Zimbabwe kumncintiswano wokudinga intshantshu zezwekazi lase Africa sizazama lathi ukuthi sithabise abalandeli bethu kanye lozulu wase Zimbabwe.
Umqeqetshi weqembu le FC Platinum uNorman Mapeza uthi nxa inhlelo zabo zingahamba ngendlela bengadlala imidlalo eyokuzwana amandla lamaqembu akwele Zambia lase Malawi phambilini kokuyangqikilana kwabo leqembu lase Angola.
Iqembu elizanqoba phakathi kwele FC Platinum lele Desportivo de Agosto lizadibana lelizanqoba phakathi kwele Bidvest Wits elase South Africa kanye lele Pamplemousse elase Mauritius kuhlandla elilandelayo elomncintiswano.
