amalinks wokungena

Breaking News

IHighlanders Ibhuqwa 4 kwaZero yiCaps United


Caps United Football Club

Badidekile abalandeli beqembu leHighlanders ngemva kokuba iqembu labo libhuqwe ngele CAPS United ngeNsonto emdlalweni walo owakuqala eliwudlale ngemva kokuhamba komqeqetshi uKelvin Kaindu.

Umqeqetshi oyisizalwane selizwe le Zambia uKelvin Kaindu usolwe kakhulu njengesehluleki ngabalandeli kanye lenkokheli zeqembu le Highlanders ensukwini ezedluleyo wacina etshiya umsebenzi kodwa impumela eyomdlalo wangeNsonto lapho iBosso etshaywe khona liqembu le CAPS United nge 4 ka nya iveza ukuba lundoda engabe esuselwe amanqe yena emsulwa.

Inkinga ekhanya iphazamisa iqembu le Highlanders yikungaziphathi kwabadlali njalo phambilini komdlalo walo lele CAPS kube lemibiko efakwe ebulenjini ethi kulabadlali abane ababonakale besebhawa edolobheni lako Bulawayo ekuseni yangoMgqibelo.

Ukungaziphathi kwabadlali phambilini kwemidlalo ngesinye sezizatho ebesibekwa nguKaindu njengembangela yokungaqhubi kuhle kweqembu kodwa laba abamsolayo bathe uzama ukucatsha ngomunwe.

U Mark Mathe nguye othethe isikhundla sika Kaindu njalo abalandeli beqembu le Highlanders abanengi bakuthakazelele lokhu kodwa kuthe ngemva kokubhaxabulwa kwe Bosso yi CAPS United bahle baqala ukukhonona njalo ebulenjini bethi akazi wenzani.

Impumela yemidlalo yangempelaviki itshiye iqembu le Dynamos lilokhu liphezu kwengalane selilemiklomelo engamatshumi amane lathoba munwe munye kuthi ngemva kwalo kuleqembu le ZPC Kariba elilemiklomelo ngamatshumi amane lesikhombisa.

Kundawo yesithathu kuleqembu leCAPS United elilemiklomelo engamatshumi amane lanhlanu kuthi iHighlanders ikundawo yesine ilemiklomelo engamatshumi amathathu lathobamunwe munye.

Ngaphansi kwengalane amaqembu ahlezi kundawo ezine okutsho ukuba yiwo asengozini eyokugunyulwa kusigaba se PSL ngathi iChiredzi yona ejeke amanye amaqembu ilemiklomelo elitshumi lane.

Phezu kwe Chiredzi kuleqembu le Bantu Rovers elilemiklomelo engamatshumi amabili lanye ikanti phezu kweqembu le Bantu kuleqembu leBlack Rhinos leqembu le Triangle womabili elemiklomelo engamatshumi amabili lesikhombisa ngalinye.

…………………………………………………………………………………………………………………………………………………………………………………………………………………….

Kolunye udaba olumayelana lomdlalo wenguqu imidlalo yeligi ibingekho emazweni amanengi kuzwekazi lase Africa lase Europe njengoba bekudlalwa imidlalo eyokudinga amaqembu azakuyaphatheka kuma finals emncintiswano eyokudinga intshantshu zalawo mazwekazi.

Kumidlalo ye Afcon edlalwe ngempelaviki iqembu elimela ilizwe le South Africa liqhubekela phambili lisenza izimanga njengoba litshaye ele Congo nge 2 ka nya lidlala lingekho ekhaya njalo yilo eselikhokhela kungalane yesibaya sika Group A ikanti iqembu eliphethe isicoco ele Nigeria liqhuba nzima njengoba kuyilo elijeke amanye kulesisibaya ngemva kokudliwa ngele Sudan.

Ngase Europe ilizwe eliphethe inkezo yeEuro ele Spain lithuthukise amathuba alo okuyadlala kuma finals alumncintiswano ngemva kokunqoba ele Luxembourg nge 4 ka nya emdlalweni wesibaya sika Group C kodwa banengi abathandabuza ukuqina kwalo iqembu le Spain ngemva kokuba linqotshwe ngele Slovakia ngeviki edluleyo.

Kusibaya sika Group E iqembu elimela ilizwe le England yilo elihlezi phezu kwengalane ngemva kokunqoba ele Estonia nge 1 ka nya okutsho ukuba selinqobe kuyo yonke yomithathu imidlalo eseliyidlalile kulumkhankaso.

XS
SM
MD
LG