Inhlanganiso yenguqu kwele Zimbabwe eyeCastle Lager Premier Soccer League (PSL) isihlawulise iqembu leHighlanders inkulungwane ezimbili zamadola eMelika ($2,000) elitholakale lilecala lokwenza udlakela olwamisa umdlalo weqembu leli leFC Platinum eMandava Stadium lapho okwaqhamuka khona udlakela.
Idale lePSL Disciplinary Committee liphume lesinqumo sokuthi iBosso kayilacala lokumisa umdlalo kodwa elokwenza umsindo eMandava Stadium lapho okwacina kuyekelwa umdlalo walo leFC Platinum.
Umbiko eliwethule ebulenjini bokuzilibazisa obeFacebook, inhlanganiso le ithe iqembu leBosso lesulelwe amakhulu amahlanu amadola eMelika ($500) kusigwebo lesi ngakho-ke kumele libhadale inkulungwane lamakhulu amahlanu amadola ($1,500) ekupheleni kukaNtulikazi.
IBosso iphinde yatshelwa ukuba akumelanga yenze okufanayo kuze kuphele imidlalo yonke lonyaka. Ingakwenza lokhu kuzamele ihlawule ikhulu lamadola elisuzwe kusijeziso lesi.
Idale lePSL Disciplinary Committee lithe impumela yomdlalo ongasaphelanga kumele ingaguqulwa. Umdlalo wamaqembu la waphela engutshiki lobhanqa 1-1.
IHighlanders isanda kuhlawuliswa inkulungwane ezingamakhulu amane zamadola ($4,000) yokwenza udlakela emdlalweni ongaphutshanga phakathi kweqembu leli leDynamos owadlalelwa eBabourfields Stadium koBulawayo.
Idale leli lathathela iBosso imiklomelo lanika iqembu leDynamos.
Abalandeli beHighlanders bazondiswa yikuhlohla kweDynamos abathi kwakungaqondanga kwathi-ke emdlalweni weFC Platinum iqembu leli laphiwa umbekwa ngunompembe sokusele isikhatshana ukuthi umdlalo uphele.