Iqembu le Highlanders lifinyelele ukuyadlala kufinal yalonyaka eyomncintiswano we ZNA Charities ngemva kokunqoba elikwenze ele Chicken Inn emdlalweni oqale ngeSonto waphela ngoMvulo nge 2 ka 1.
Lumdlalo ubumiswe sekudlalwe imizuzo engamatshumi amahlanu lanhlanu ngenxa yezulu ebelilombane njalo ngalesosikhathi iqembu le Chicken Inn belikhokhela nge 1 ka nya lihlohlelwe ngu Clemence Matawu.
Kuthe lumdlalo usuqhubekela phambili iqembu le Highlanders laguqula isimo lahlohla kabili kumizuzu engamatshumi amathathu lanhlanu njalo lihlohlelwe ngu Adrian Silla lo Peter Muduhwa.
Umqeqetshi weqembu le Highlanders uMadinda Ndlovu uthe abafana bakhe basesebancane okokuthi bayaphuza ukukhathala njalo lokhu kubasebenzele.
“Besikwazi ukuthi abantu esidlala labo ngabantu abakhulileyo yikho namhlanje sihle saqala ngesiqubu esikhulu njalo lokhu kusiphathisile ukuba sihlohle kabili,” kutsho uNdlovu.
Iqembu le Highlanders selizadibana lele Dynamos lona elifinyelele ku final ngemva kokunqoba ele CAPS United nge 1 ka nya emdlalweni oqhutshelwe enkundleni ye National Sports Stadium ngeSonto.
Lumdlalo uzaqhutshelwa esigodlweni iHarare ngeSonto njalo iqembu elizanqoba lapho lizathola inkulungwane ezilitshumi lanhlanu kuthi elizanqotshwa lizathola inkulungwane ezilitshumi.
Umncintiswano lo uqhutshwa kuyingxenye yenhlelo ezokuphathisa abafelokazi labagogekileyo abakubutho lesizwe.
