amalinks wokungena

Breaking News

Ihlandla Lesithathu LwabeZimbabwe Abasemazweni Abakhulumisana Lula kuInternet


Ngosuku lwesithathu endabeni zethu ezikhangela indlela ubulembu be internet obusiza ngayo impilo yezizalwane zeZimbabwe ezikwele South Africa, intatheli zindaba uBenedict Nhlapho uhlaziya indlela abeZimbabwe laba abasebensiza ngayo uhlelo lweFacebook ukuhlomisana ngazo zonke izinto abazidingayo empilweni yabo eGoli.

Umuntu ngumuntu ngabantu, kukhanya kuyiwona amazwi ahlakaniphileyo enza izizalwane zeZimbabwe ezikwele South Africa zikhande icebo lokusondelelana ukuze baphathisane ebunzimeni bempilo.

Lokhu sekwenze bavula amaqembu amanengi inengi kufacebook lapho umuntu othi loba elohlupho lwemisebenzi, efuna ukuthenga imota, ehlutshwa yimimoya, edinga imithandazo, loba esechithekelwa ngumtshado abhalele khona ukuze athole usizo.
Intathelizindaba yeZimbabwe uNdumiso Mlilo uthi ifacebook igcwele inqwaba yamaqembu ezizalwane zeZimbabwe akhuluma ngayo yonke into ongayicabanga ngaphansi kwelanga. Uthi okungcomekayo yikuthi ezinye izinto ezabelwana kula maqembu lulwazi oluguqula impilo zabantu njengokuthi umuntu ahlanganiswe loyise lonina engakaze ababone lokhu azalwayo.

Owesifazana weZimbabwe unkosazana Adelate Ndebele, uthi kuye ifacebook sekuyindawo yokuzingela loba yini ayifunayo empilweni njengoba kubikwa konke ngempilo yabo emazweni.

Undumiso Mlilo uthi enye into eyahlukile ngamaqembu abeZimbabwe lawa akufacebook yikuthi kukhulunywa ngitsho lendaba ezisegudwini abantu abangafuni ukuzikhuluma obala ngoba besesaba kumbe belamanhloni.
Uthi sekukunengi asekubalile kuma qembu efacebook la okungenzeka sekwaqinisa imitshado eminengi.

Lokhu kugcizelelwa ngumnumnzana Gibson Ndethi odabuka ePlumtree yena osewaze wavula iqembu lakhe elithi Inkinga zocansi.

Abathanda ezamasiko labo balawabo amaqembu lapho okulondwa khona imvelaphi yabantu, kucine izihlobo zivumbululana zingazani.

Akhona njalo awezokholo lapho okuphoswana khona ngamavesi lezingoma kuphela.
Labo abafunda ezikolo ezifanayo labo balawabo amaqembu lapho abakhumbuzana khona ezakudala kuphinde njalo kukhuthazwane ngendlela zokuthuthukisa impilo zabo.

NgoLwesine endabeni zethu ezikhangela ukusetshenziswa kobulembu be internet yizizalwane zeZimbabwe ezise Goli, sizakhangela amaqembu asebunjwe ngabeZimbabwe laba ngenjongo yokuthuthukisa indawo abadabuka kuzo eZimbabwe.
XS
SM
MD
LG