amalinks wokungena

Breaking News

I-HRW Yethesa Uhulumende Umlandu Wokubangela Udubo Lwamanzi eHarare


Water Crisis
Umbiko owethulwe yinhlanganiso elondoloza amalungelo oluntu emhlabeni jikelele eye Human Rights Watch e-Harare ngoLwesibili wethesa uhulumende umlandu wokubangela uhlupho lokusilela kwamanzi lokungathwalwa kuhle kwengcekeza ephuma ezambuzini ngemisebenzi yeziphathamandla zakhe yokungathembeki eye Corruption.

Ugwalo oluphansi kwesihloko esithi “Troubled Water: Burst Pipes, Contaminated Wells and Open Defecation in Zimbabwe’s Capital” luthi izakhamizi zeHarare ezinengi kazenelisi ukufinyelela ukuthola amanzi kanye lezambuzi ezihlanzekileyo.
Inengi lazo libikwa licina linatha amanzi angahlanzekanga avela emithonjeni loba izibholane ezingavikelwanga kumbe ezingena amanzi avela ezambuzini.

Esethula lolu gwalo umnumzana Dewa Mavhinga isiphathamandla seZimbabwe kuhlangothi lwemhlubulweni wangezansi wezwekazi leAfrica olwe Human Rights Watch’s Southern Africa Division, uthe inhlolisiso abayenzileyo iveza ukuba uhulumende akaqakathekisi inhlelo zokutholisa uzulu amanzi ahlanzekileyo kanye lokuthwalwa kwengcekeza ephuma ezambuzini.

Uqhubeke ethi uhulumende kanye labomanisiphala bayehluleka ukusebenzela ndawonye enhlelweni zokutholisa uzulu amanzi ahlanzekileyo. Ethi amacele womabili kumele basebenzelane aphume lamacebo okuvuselela umsebenzi wokuhlanza amanzi lokuthwalwa kwengcekeza zezambuzi ikakhulu eHarare.
UMavhinga ukhuthaze ugatsha lwentuthuko yezabelo ukuthi kumele lusebenzise imali ephathelane lokutholisa uzulu amanzi ahlanzekileyo kuleyo misebenzi hatshi ukuyiphambula isisetshenziswa kwezinye inhlelo.

Elinye icebo elinikwe ngabe Human Right Watch ngelokuthi ikhansili yeHarare mayitshiyane lomkhuba wokuvalela abantu amanzi ngenxa yokungabhadali isikhwelede somthelo wamanzi, izame ukudinga ezinye indlela zokutholisa uzulu amanzi ezifana lokwemba izibholane kanye lokwakha izambuzi ezingasetshenziswa nguzulu nxa engenelisi ukusebenzisa ezisemzini yazo.

UMavhinga ukhuthaze njalo ugatsha lwezempilakahle ukuthi aphathise ngokuhlala ehlola izibholane ezisetshenziswa nguzulu ukuthi zihlanzekile na. Wathi inhlanganiso ezizimeleyo zilakho ukuphathisa ngolwazi lengcwethi ekulungisiseni uhlupho lwamanzi eHarare.

Abenhlanganiso yezakhamizi eye Combined Harare Residents Association-CHRA kanye leye Harare Residents Trust-HRT abakade bekhona labo emkhosini lo bancome kakhulu lumbiko lamacebo anikwe ngabe HRW zisithi ngempela ukuzibeka sobala inhlupho ezibhekane lezakhamizi zeHarare.

Umbiko lo owethulwe namhlanje ngabe HRW wenziwe ngemva kwenhlolisiso abenhlanganiso le bekhuluma lezakhamizi ezimbalwa phakathi kwamaviki athoba minwe mbili phakathi kwenyanga kaMpandula nyakenye kuze kuyefika uMfumfu lonyaka.

Idolobho leHarare likhethwe ukwenzelwa linhlolisiso ngoba liyilo isigodlo selizwe njalo liyilo elithwale nzima ngokuqhamuka kwemikhuhlane yesihudo secholera olwabulala abantu abambalwa phakathi komnyaka ka2008 lo 2009.
XS
SM
MD
LG