Uhulumende weZimbabwe uthi amajekiseni okwelapha umkhuhlane weCoronavirus awathenjiswe yiChina azaqala ukufika elizweni ngeviki ezayo mhlaka 15.
EleZimbabwe ngelinye lamazwe alitshumi lane azathola amajekiseni la, wona alungiswe yinkampani yaseChina iSinopharm.
Uhulumende uthi iZimbabwe izaphiwa amajekiseni azinkulungwane ezingamakhulu amabili, 200,000.
Umphathintambo obona ngokwethulwa kwembiko uNkosazana Monica Mutsvangwa wazise izolo ukuthi inhlanganiso ebona ngezempilakahle emhlabeni jikelele iWorld Health Organization yavuma ukuthi ijekiseni yeSinopharm isetshenziswe ukwelapha iCovid-19 ngokusemthethweni ngoba ilokuphumelela okungedlula isilinganiso sokungamatshumi ayisikhombisa ekhulwini kusiya kwayisitshiyagalolmbili, 76-86 percent.
Wengeze wathi uhulumende uzaqhubeka edinga amanye amajekiseni afana leyaseRussina iSputnik V. EleIndia leleBhilithani lawo athembisa ukuphathisa iZimbabwe ngamajekiseni.
Kusenjalo, inani lasebebulewe yiCovid-19 eZimbabwe likhwele laya kunkulungwane elamakhulu amathathu lamatshumi amahlanu lantathu, 1,353, izolo ngemva kokubhubha kwabantu abalitshumi lane, 14.
Ababanjwe umkhuhlane lo izolo njalo balikhulu elimalatshumi amabili lantathu, 123.
Lokhu kukhweze inani lasebefunyenwe beleCovid-19 kuleli laya kunkulungwane ezedlula amatshumi amathathu, 34,781.
UNkosikazi Jasmine Toffa, okukhomithi yezempilakahle edale lephalamende, utshele iStudio 7 ukuthi umkhuhlane weCovid-19 uqhubeka umemethaka.
Isiphathamandla senhlanganiso yeZimbabwe Christian Alliance uMnu Useni Sibanda utshele utshele lumsakazo ukuthi kuyinto enhle kakhulu ukuthi amajekiseni asezatholakala eZimbabwe.