amalinks wokungena

Breaking News

Ikhansili YakoBulawayo Ikhuthazwa Ukudinga Amacebo Okulungisisa Udubo Lwamanzi


Bulawayo City Council.

Uzulu wakoBulawayo uthi ukusilela kwamanzi sekubakhipha ubuntu ngoba inengi selithola amanzi ebusuku kuphela osekudala ukuthi basebenzise iganga lokuhlala ezindlini kungahlanzekanga.

Ngenxa yokukhula kodubo lokusilela kwamanzi koBulawayo, umanisiphala waleli dolobho uthi usebanjwa ngamandla ukwabela amalokitshi amanzi ngamalanga ehlukeneyo, ilokitshi ngalinye lithola amanzi ngemva kwensuku eziyisithupha. Laloba kunjalo amanye izakhamizi zamanye amalokitshi zikhala ngokuti sezilenyanga ezimbalwa zingatholi manzi.

Umnumzana Prince Ndlovu isakhamuzi sakoBulawayo uchasisa ngobunzima abahlangana labo ngokusweleka kwamanzi.

“Njengoba izulu selinile okwakhathesi basivulele kumbe 2hours ngoba khathesi nxa sikhangela imisebenzi eminengi ukuze siyenze iyabe idinga amanzi lakhathesi kunje abantwana bathwala nzima nxa besiya ezikolo ngenxa yamanzi kuluhlupho kakhulu.”

Unkosikazi Ethel Tshuma oyisakhamuzi seNkulumane uthi akusebenzeki ukulondoloza ukuhlanzeka emizini yabo ngamanzi abawathlayo.

“Amanzi abuya ilanga litshonile athathe okungamahola okulutshwane lingakaqedi lokukhelela lokuwatsha ngoba mhla amanzi ebuyile kunengi okwenziwayo abantu behlanza izinto kuthatha isikhathi eside kucina kungaphelanga. Kwesinye isikhathi awafinyeleli kithi size siyecela pho amanzi okucela kawafani lozikhelela wona empompini njalo uzatshelwa ukuthi sokwanele lami ngilebill sicine sesibhadaliswa kubuhlungu kakhulu.”

Esinye njalo isakhamuzi sakoBulawayo uNkosikazi Melissa Sithole ukhala ngesikhathi esibuya ngaso amanzi esingahlelekanga.

“Okusuke kusimangalise kakhulu yikuthi ama timetable eyekhitshwa kuqala ayekhipha iqiniso, khathesi kunzima ngoba amanzi engahamba ahambile awabuyi lemizamo kaCity Council asiyiboni ezinye indawo zolokhe zingela zikotsho ezaneleyo, labaletha amanzi babuya ngesikhathi sabo lokhu kusuka kube ngani yingabomo ngabe bayalungisisa besibuze sibatshele ukuthi kungenziwa njani ngoba yithi esithwele nzima.”

Ngalokho usikhwicamfundo uLerato Nare ukhuthaza ikhansili yakoBulawayo ukuthi ixoxisane lozulu ukuze ithole amacebo okulungisisa lolu dubo lwamanzi.

“Ngingaya kuCommunity engela bantu ngibabuze ukuthi singafikisa amanzi lapha njani, kumele sithembe ukuthi uzulu ulamandla okucabanga ngamacebo angabasiza, khathesi uhlupho esilalo yikuthi ikhansili icabanga ukuthi yiyo elamacebo enganiki ababhekane lohlupho ithuba.”

Okwamanje amalokitshi amanye athola amanzi kumaWater Kiosk akhiwa zinhlanganiso ezizimeleyo, kuthi amanye athola amanzi ezikotshweni.

UBulawayo unatha emadamini ayisithupha kodwa amanye awo, awasela manzi ngenxa yokungani kuhle kwezulu okweminyaka emithathu ilandelana. Uhulumende walaya umanisiphala wakoBulawayo ukuthi adinge ezinye indlela zokuthola amanzi. Ikhansili yona ithi ngaphandle kwamanzi avela emigodini yaseNyamandovu Acquifer ilakho ukuthola amanzi avela edamu leKhami. Ithi njalo kudingakala izigidi phose eziyisitshiyagalombili zamadola eMelika- USD77 million ukuthi lulungisiswe uhlupho lwamanzi kuleli dolobho. Kodwa ugatsha lwentuthuko yezabelo luthi kudingakala izigidi eziyisitshiyagalombili zamadola eMelika kuphela – US$8 Million.

please wait

No media source currently available

0:00 0:04:16 0:00

Facebook Forum

XS
SM
MD
LG