amalinks wokungena

Breaking News

Ilunga leMDC Litshela Amalunga Ekhomishini Ehlolisisa Ukudutshulwa Kwabantu Ukuthi Basekela iZanu PF


Bahlola indawo lapho okwaba lodlakela khona eHarare ngoNcwabakazi lonyaka.

Kube lokufuthelana ngoLwesine kukhomishini ehlolisisa ukubulawa kwabantu ngoNcwabakazi lonyaka ngesikhathi umlandeli webandla leMDC elikhokhelwa nguMnu. Nelson Chamisa esipha ubufakazi eHarare.

UMnu. Islam Matosi utshele ikhomishini le ukuthi kabathembi abantu abakhomishini ngoba kukhanya belobudlelwano lebandla leZanu PF.

Uthe kaboni ukuthi kuzaphumani kukhomishini njengoba kusobala ukuthi bafuna ukuthi kuchothozwe ibandla leMDC ngokwenzakala ngalelolanga kuze kubulawe abantu abayisithupha.

UMatosi uthe, “Abantu balahlekelwa zimpilo kodwa sihlezi lapha sisithi asizanga ukuzokhuluma ngokhetho kodwa laba abantu babulawa ngenxa yokhetho. Ukhetho yiyo imbangela abantu babulawa ngoba babefuna ulwazi lwempumela yokhetho. Ngakho siyaphambanisa nxa sisistsho njalo.

UMnu. Godwills Masimirembwa ukhuluma loMnu. Kgalema Mothlante wakwele South Africa ngokudutshulwa kwabantu eHarare.
UMnu. Godwills Masimirembwa ukhuluma loMnu. Kgalema Mothlante wakwele South Africa ngokudutshulwa kwabantu eHarare.

“Amanye amakhomishina abalapha babephatheke kulolukhetho abathi akumelanga sikhulume ngalo njalo bahlezi lapha bafuna ubufakazi bethu bona babengonompembe kulolu khetho. Kumele kwazakale ngumhlaba wonke ukuthi ikhomshini le yayihlanzeke kanjani ukuthi iqhube umsebenzi wayo ngokuthembekileyo.”

Uqhubeke esithi abantu abanjengo Professor Lovemore Madhuku lo Nkosikazi Charity Manyeruke ngabantu abaphumela egcekeni ngokujabulela indlela ukhetho olwaqhutshwa ngayo bengakabi ngamalunga ale ikhomishini.

Omunye wabakade bekhona uMatosi esethula ubufakazi lobu, uMnu. Ostalos, uthe bamiswe ukupha ubufakazi ngoLwesine.

Ingcitshi ebona ngezombusazwe, uMnu Mthabisi Donga, uthe umsebenzi wekhomishi uzaphambaniseka ngoba kungela kwethembana.

“Udubo olukhona yikuthi ikhomishini le kayithenjwa ngabantu bonke kungakho-ke kuzehlula ukuthi iphume lezinqumo ezizamukelwa ngabantu.”

Inengi labantu abasola ukwenza kwekomishini le bathi kumele ihlolisise ukuthi ngubani owathumela amasotsha.

Udaba lwabanye abakade bemele bafakaze abaliswe ukungena enkundleni yomhlangano lube ludaba egudwini namhlanje.

Imizamo yeStudio 7 ukuthi indingisise ukuthi abanye abafakazi bayaliselweni ukungena itshayelele edwaleni ngemva kokuba amapholisa ethe lokhu bekusemandleni kanobhala wekhomishini obona ngobufakazi yena okade ebambekile ngomsebenzi emahofisini angaphakathi.

Udaba Esilethulelwe NguGibson Bhebhe
please wait

No media source currently available

0:00 0:04:03 0:00

Facebook Forum

XS
SM
MD
LG