Kubikwa ukuthi ikhomishini ehlolisisa ukubulawa kwabantu ngoNcwabakazi lonyaka libutho eHarare, ifisa ukubiza uMnu. Nelson Chamisa, uMnu. Tendai Biti labanye abantu osokukhulunywe ngabo kukhomishini le ethapha imibono kazulu.
UNkosikazi Virginia Mabhiza, omunye wabakukhomishini le ekhokhelwa ngowayengumongameli kwele South Africa, uMnu. Kgalema Motlanthe, utshele iphephandaba leNewsDay ukuthi bazabizwa ukuba baphe ubufakazi babo ngeviki ezayo.
UNkosikazi Mabhiza uthi ikhomishini le ilamandla okubiza abantu loba bengafuni ukuthi bezekwethula ubufakazi babo.
“Ikhomishini le izabiza bonke abantu okucatshangelwa ukuthi balesandla ekudutshulweni kwabantu njalo lokukhuthaza uzulu ukuthi ayenze ubudlwangudlwangu kungakenziwa ukhetho, ngesikhathi sokhetho langesikhathi sokwenziwe ukhetho. Umthetho uyasivumela ukuthi sibambe abantu ngamandla ukuthi bazekwethula ubufakazi kukhomishini le.”
Amasotsha, amapholisa labalandeli bebandla leZanu PF batshele ikhomishini le ukuthi uChamisa labanye abakubandla leMovement for Democratic Change yibo abaphehla udlakela olwenza ukuthi kudutshulwe ezinye izizalwane zeZimbabwe eHarare kusanda kwenziwa ukhetho.
Kwadudutshulwa abantu makhaza ngesikhathi kulabanye ababetshengisela bekhonona ngokuphuza kwe Zimbabwe Electoral Commission ukuthi yethule impumela yokhetho lukamongameli.
UMongameli Emmerson Mnangagwa wanqoba kukhetho lolu kodwa uChamisa wahambisa udaba lolu emthethwandaba lapho okwaphuma isinqumo sokuthi uMnangagwa nguye owanqobayo.
UChamisa lokhe esithi nguye okumele abengumongameli weZimbabwe hatshi uMnangagwa.
Sehlulekile ukukhuluma loChamisa ngazakwenza ngokufiswa yikhomishini ekhokhelwa nguMotlanthe.