amalinks wokungena

Breaking News

Ikhomishini Yamalungelo Ithi Akulamuntu Omele Aphoqwe Ukuhlaba Ijekiseni yeCovid-19


Zimbabwe VP at Wilkins Hospital Preparing for Covid 19 Vaccine
Zimbabwe VP at Wilkins Hospital Preparing for Covid 19 Vaccine

Ikhomishini ebona ngokulondolozwa kwamalungelo oluntu, iZimbabwe Human Rights Commission, ithi uhulumende kanye lamankampani azimeleyo akumelanga baphoqe izisebenzi ukuthi zihlatshwe ijekiseni yeCovid-19 nxa zingafuni ngoba lokho akukho emthethweni.

Kumbiko ewethule izolo, ikhomishini le ithe okungenziwa ngabaqhatshi yikukhuthaza izisebenzi lezi kuphela ukuthi zihlatshwe hatshi ukuzibamba ngamandla.

Ithe uhulumende labaqhatshi kumele bahlonipho iziqondiso ezibekwe yiWorld Health Organization (WHO) ezikubeka sobala ukuthi abantu kumele bazikhethele ukuthi bayafuna na ukuhlatshwa kumbe abafuni.

Yengeze yathi ikhathazekile kakhulu ngembiko yokuthi kulabanye abaqhatshi asebebambela izisebenzi ezingahlatshwanga iholo kanye labanye asebevimba izisebenzi lezi ukuya emsebenzini.

UMongameli Emmerson Mnangagwa useke wethula amazwi athi sizafika isikhathi lapho abantu abangahlatshwanga lijekiseni abangasoze bavunyelwe ukuthola imisebenzi.

Likhomishini ithe njalo iphatheke kubi ngokusilela kwamajekiseni okuvikela iCovid-19 kwezinye indawo ikakhulu emaphandleni.

Ngakho, ithe kumele uhulumende atholise indawo zonke amajekiseni la ukuze kuhlatshwe bonke abafunayo.

Isiphathamandla senhlanganiso esebenza lozulu wemaphandleni eyeRural Communities Empowerment Trust uMnu Vumani Ndovu utshele iStudio 7 ukuthi ukusilela kwamajekiseni la emaphandleni kuya kusiba nganeno kwezinye indawo.

please wait

No media source currently available

0:00 0:02:31 0:00

Igqwetha likaMongameli Mnangagwa uMnu Tinomudaishe Chinyoka yena utshele lumsakazo ukuthi uhulumende akabambi izisebenzi zakhe ngamandla ukuthi zihlatshwe.

Kodwa uChinyoka uthe uyenelisa ukukwenza lokho kungaba lesidingo ukuze kwenqatshelwe ukubulawa kwabantu yi-coronavirus, yona esibhahile elizweni lonke jikelele.

XS
SM
MD
LG