amalinks wokungena

Breaking News

'Ilizwe leZambia Lephule Umthetho Ngokubisela uTendai Biti eZimbabwe'


UMnu. Tendai Biti legqwetha lakhe eHarare ngoLwesine.

UMnu. Gilbert Phiri, obemele uMnu. Tendai Biti kwele Zambia, uthi ilizwe leZambia lephule imithetho yeziphepheli, eyokwethekelela amazwe kanye leyomhlaba wonke jikelele ekhangelane leziphepheli.

UPhiri uthe abaphathintambo bezokwethekelela ilizwe leZambia kanye lamapholisa bayalile ukwamukela isinqumo esethulwe ngumthethwandaba kwele Zambia obuthe kumele kuhlolisiswe okufiswa nguBiti obefuna ukuthi abeyisiphepheli. Uphinde wathi uBiti kazange ephula imithetho yokwethekelela kwele Zambia.

“Iziphathamandla zephule umthetho weRefugee Act of Zambia, owe Immigration Act kanye lowokubisela abantu lapho abavela khona owe Deportation Act. Okusobala yikuthi akusilocala ukuthi umuntu weZimbabwe kumbe wakwele Zambia angene emazweni la engela maphepha omgcele ama visas. Lokhu akulani lokuthi umuntu udinga ukuba yisiphepheli kumbe hatshi. Obelelungelo lokuhlala kwele Zambia okwenyanga.

UPhiri uthe bekumele uBiti anikwe amalanga ambalwa ukuthi ahlale kwele Zambia.

“Umthetho wokudinga ukuba yisiphepheli owe Refugee Act wakwele Zambia kanye lowezethekeli lokubiselwa lapho ozalwa khona nguhulumende owe Immigration and Deportation Act kukubeka sobala ukuthi kumele aphiwe amalanga ayisikhombisa ukuthi alungise konke akufunayo. Ukubiselwa kwakhe kwele Zimbabwe ukuyabhekana labantu abamdinga ngamehlo abomvu kwephula iziqondisi zemithetho yeziphepheli emhlubulweni wezwekazi leAfrica eSADC. Imithetho yeSADC ikubeka sobala ukuthi ungeke wabiselwa lapho ovela khona ukuyabhekana labantu abafuna ukukususela amanqe.

Uphinde wathi iziphathamandla zakwele Zambia ezale ukwamukela amaphepha awomthethwandaba kazilandelanga umthetho welizwe.

“Okwenziwe ngamapholisa labanye abokumele bamukele amaphepha la kusitshiye singela mathe. Kuyamangalisa ukuthi kulabantu abanje abephula umthetho bekwazi ukuthi abakwenzakyo akukho emthethweni. Isenzo sabo lesi sephule imithetho yomhlaba wonke jikelele ebona ngeziphepheli kanye lokwethekelela amanye amazwe. Kuyadanisa kakhulu lokhu okwenzakale kwele Zambia ngoba ilizwe leli lijayele ukumela iziphepheli. Owaba ngumongameli wakuqala kwele Zambia uKenneth Kaunda lowamlandelayo u(Fredrick) Chiluba kanye labanye omongameli babesamukela iziphepheli ngenhliziyo emhlophe. Lokhu okwenzakale kuTendai Biti kuyamangalisa kakhulu. Asikwazi lapha lokhu. Samukela abantu abavela kwele South Africa, eCongo lamanye amazwe ababebalekela ukubulawa. Ilizwe leZambia belivele likwenza lokhu. Kodwa-ke lokhu kuyamangalisa sibili.”

Ingxoxo Esiyenze LoMnu. Gilbert Phiri
please wait

No media source currently available

0:00 0:03:26 0:00

Iziphathamandla zakwele Zambia zithi kwehlule ukuthi uBiti ahlale kulelolizwe ngaphansi kohlelo lweziphepheli ngoba icala lakhe belingelasisindo.

Kodwa-ke amagqwetha kaBiti athi uthunjwe ngamapholisa eZimbabwe ebambisana laweZambia.

IStudio 7 iphinde yaxoxa ngodaba lolu loMnu. Dellane Masiye Mhlanga, intathelizindaba ezimele yodwa, othe kuyamangalisa kakhulu okwenziwe nguhulumende wakwele Zambia.

Ingxoxo Esiyenze LoMnu. Dellane Masiye Mhlanga
please wait

No media source currently available

0:00 0:03:11 0:00

Facebook Forum

XS
SM
MD
LG