amalinks wokungena

Breaking News

Nkosana Moyo: Lingavoti Ngokuthi Ngubani Olinika Utshwala


Umnumzana Nkosana Moyo

Umkhokheli webandla eliphikisayo ele APA, uchasisa kabanzi akumeleyo lalokho akuthembisa uzulu nxa engakhethwa.

"Khethani libone ukuthi umuntu okwazi umsebenzi ngubani, hayikhona ukuthi olithengela utshwala ngubani osinika inyama ngubani. Ngoba abantu bakhankasa bethenga ivoti yabantu, kulokuthi balalele batshele abantu ukuthi sizalungisa kuphi? Into esayiphambanisayo izolo yiphi esizayilungisa lamuhla".

Lo ngumkhokheli webandla le APA umnumnzana Nkosana Donald Moyo. Umnumnzana Moyo ozelwe eMakuva eMberengwa ngo 1951, ngomunye wabazancintisa ekhethweni lukamongameli weZimbabwe.
Yenake yindoda efundileyo impela eyiSkhwicamfundo kwezescience kanti uqeqetshile njalo ezifundweni zamabhizimusi. Lokhu kwenze wasebenzela amankampani amakhulu kwezomnotho agoqela iAfrican Development Bank, i Actis Capital LLP le Standard Chartered Bank.

Uqale ukungena kwezombusazwe ngesikhathi ekhethwa ngumnumnzana Robert Mugabe ukuba ngumphathintambo wogatsha lwezokuthengiselana ngo 2000, lobanje esithi wemukelalo umsebenzi hatshi ngoba elilunga leZanu pf kodwa ngoba eyisizalwane seZimbabwe. Lowo msebenzike waphela esebalekile elizweni ngoba ebona ukuthi okufanele akwenze lalokho okufunwa ngumnumnzana Mugabe akuhambelani.

Ngo Nhlangula ka 2017 wazise ukuthi usebumba ibandla lakhe leAPA kanti futhi uzancintisa ekhethweni lukamongameli welizwe. Okusemqoka kuye uthi yikuvuselela umnotho welizwe, ukuletha umanyano elizweni, ukubaleqiniso lokuthi amasotsha, amapholisa, inhloli labomehluli basebenzela uzulu hatshi ibandla elizusayo.

Emqulwini webandla lakhe wokukhankasela ukhetho ubalisa njalo ukuthi ukuqeda inkohlakalo, ukuthuthukisa ezokwethekela, ezokwenjiwa, ezokulima lezokusungulwa kwamabhizimusi ngezinye zezinto ezizaqakatheka kakhulu kuye nxa ekhethiwe ukuba ngumongameli.

Kodwake isizalwane seZimbabwe umnumnzana Jonathan Mbedzi uthi malutshwana amathuba okuthi umnumnzana Nkosaza alunqobe ukhetho lokuba ngumongameli weZimbabwe.
"Uqale late uma kuthiwa uqale earlinyana obezokhona ukuthi adobhanyana amaseats abonakalayo. Angiboni ukuthi kuzoba le anything azoyenza ukuthi abantu bemvotele ukuthi uzothola iseat or something like that".

Umculi UDJ Mapressa uthi uMoyo akalalo udumo oludingeka kulowo onganqoba kulolukhetho.

"Abantu abavotayo abeZimbabwe abadingisisi kanzima amaqualifications alowo muntu ofuna ukuvotelwa kodwa into abayenzayo yikuthi bagijimisa igama yilo abalivotelayo. Njengamanje igama elisemlonyeni wabantu ngelithi Nelson Chamisa lelithi uMnangagwa".

Kodwake uMoyo yena uthi uDavida wamnqoba uGoliyathi.


"Yinto yezolo leyo eyokuthi bekuloMnangagwa loChamisa, bekule MDC leZanu. Khathesi kulamaparty amanengi amatsha. Abantu abanengi sebetshintsha ingqondo yabo bebuya kithi besuka kulawo maparty".

Isizalwane seZimbabwe umnumnzana Mlungisi Tshabalala uthi uMoyo ulamakhono entweni ezinengi nxa eqathaniswa labanye abancintisa kulesi sikhundla.
"Engabakwazi lokuvuselela umnotho wezwe. Futhi uzalwa liKaranga, lomama wangakithi ngapha eSindebeleni. Lokhu kumupha igunya lokuthi ekwazi ukusebenza lenhlangothi zonke zombili".

Ngakolunye uhlangothi umnumnzana Greatman Mkhwebu uthi, isibongo sikaMoyo yiso esingamenza enganqobi.

"I disadvantage kaNkosana yikuthi ma ubuka ikakhulu endaweni zaseMashonaland ngeke athole isupporrt kakhulu ngoba ngale most umuntu ongasimhlobo wabo abamsapoti kodwa yena ube right".

Kantike isifundiswa umnumnzana Bongani Nyathi uthi okwalonyaka umnumnzana Moyo kangeke aphumelele.
"Ulamaqhinga angathi ayazwakala okuthuthukisa iZimbabwe ngemva kokhetho. Kodwake nguye yedwanje owazakalayo ebandleni lakhe, Ibandla lakhe alaziwa. Abantu abanengi abazimiselanga ukuvotela ibandla elikhokhelwa ngumuntu wesiNdebeleni".

Inengike lithi amehlo onke akumkhokheli webandla leZanu pf umnumnzana Emmerson Mnangagwa lowe MDC Alliance umnumnzana Nelson Chamisa kanti abanye bonke laba baphelekezela ababili laba.

Udaba lwembali koncintisa esikhundleni sikamongameli uMnu Nkosana Moyo siluphiwa nguBenedict Nhlapho
please wait

No media source currently available

0:00 0:04:04 0:00

Facebook Forum

XS
SM
MD
LG