amalinks wokungena

Breaking News

Imbali kaThokozani Khupe Wecele leMDC-T Uncintisa Kukhetho Lokundiga Umongameli


UNkosazana Thokozani Khupe

UMkhokheli welinye lamacele awe MDC-T, uNkosazana Thokozani Khupe, waziwa njengowesifazana olesibindi omelane lobunzima bokuhlukunyezwa obubangelwa lubandlululo bobulili.

Njengowesifazana ongendanga ubizwa ngamagama amanengi kodwa lonyaka akumvimbanga ukuthi ancintise kukhetho lokudinga umongameli welizwe ngemva kokwehlukana lecele elikhokhelwa nguMnu. Nelson Chamisa.

Laloba abanye besithi ulesibindi kulabanye abathi uMaKhupe ngumuntu othi engakholwa ulutho angaguquleki lula umkhumbulo wakhe.

Thokozani Khupe
Thokozani Khupe

IStudio 7 ixhumane loMaKhupe lapho axoxe kabanzi ngohambo lwakhe kwezombusazwe kanye lobunzima asehlangane labo kuhambo lwakhe.

UMaKhupe uzalelwe esibhedlela seMpilo koBulawayo mhlaka 18 ngoLwezi ngomnyaka ka1963 njalo ulabantwana ababili. Uthi uhambo lwakhe kwezombangazwe uqale ukuzikhuthalela ngomnyaka ka1987 esebenza lomuyi uMnu. Morgan Tsvangirai bephansi kwenhlanganiso yezisebenzi eye Zimbabwe Congress of Trade Unions (ZCTU).

“Ngiqale ezombusazwe ngomnyaka ka1987, lapha engaqala ukusebenza khona lobaba uTsvangirai. Ngaqala ukusebenza laye ngileminyaka engu31 ngasebenza laye okweminyaka engu 26. Sasizama ukulungisa into ezazihlupha izisebenzi kodwa kwehlula iZCTU yasisithi mina labanye sibumbe ibandla eleMDC sanxusa abanye ukuthi bazosebenza lathi.”

UMaKhupe uthi ufuqwa yikufisela uzulu weZimbabwe ukuthi abe lempilo enhle.

“Okungenza ukuthi ngiphatheke kakhulu yikuthi ngifisa ukuthi uzulu. Sikhululeke politically, socially, ngingaze ngihlukuluzwe lokhe ngiqhubekela phambili ngifuna ukuthi omama obaba lamajaha bathole impilo enhle ezintweni zonke angabe bezidinga.”

Thokozani Khupe
Thokozani Khupe

Uthi ubunzima obuphakathi kwezombusazwe benza omama bacine behlehlela emuva. Uthi yikho osekwenze ukuthi omama bebalutshwana kulabo ababhalisele ukuncintisa ekhethweni lwalonyaka.

“Into yabomama le iseleminyaka eminengi ilwiswa kodwa ungakhangela amabandla wonke lonyaka afake omama abalutshwana kakhulu. Ukuhlukunyezwa okwenzakale kimi kubangele ukuthi omama batshedele emuva ngoba bayabe sebesithi nxa kuhlukuluzwa omama abanjengami bazibuza ukuthi bona ke. Kodwa ngithi into leyi kumele siyilwise mina ngala ukuvinjwa ukuthi ngibe ngumongameli ngathi ngizakhokhela ngingumama njalo ngingodabuka eMatabeleland.”

Umnumzana Samukele Hadebe, osebenze ehofisini kaMaKhupe ngesikhathi sohulumende womanyano, umchaze njengomkhokheli olobuqhotho.

“Ngikhuluma ngalokho akwenze ngesikhathi engu Deputy Prime Minister ngaphansi kohlelo lwe Campaign for Accelerated Reduction of Maternal Mortality okwakungumkhankaso wokwehlisa inani labomama abalahlekelwa zimpilo bebeletha. Lokhu ubekwenza ngoba ubekhangele ingatsha ezingu12 ekhangele ezemfundo, ilabour, imedia lokunye. Kungaphethi lapho ubengu President we Women Network e Africa. Kulapho aveza khona ukuba ngumkhokheli olothando olesineke.”

Omunye njalo osebenza kakhulu loMaKhupe okwamanje ongumgcinisihlalo webandla alikhokhelayo umchaza njengomama olesibindi.

UNkosazana Khupe loMnu. Nelson Chamisa
UNkosazana Khupe loMnu. Nelson Chamisa

“Ngumuntu lowana othi engakholwa ulutho engatshintsi, njalo engakholwa ulutho abambe ngamandla njalo alumele laloba sekusebunzimeni obunganani.”

Uthi njalo ubunzima amelane labo ngesikhathi kubhubha uTsvangirai buveze ukuthi uMaKhupe ungumama oqinileyo njalo kakhalali lula.

“Khumbula ke kukalutshwana ukuthi ungafica umuntu wesintwana ohlangana lobunzima obunjalo abelokhesithi hayi ngiyaphambili kuphela. Kakulula ukuthi umuntu akuphoxe akutshisele endlini ubulokhe uphikisana laye njalo ipolitics yeZimbabwe yileyana ethi umhlobo obusayo yilowo olabantu abanengi kodwa yena usekwalile wathi singamaZimbabwean sonke.”

Olilunga ledale lephalamende, unkosikazi Nomvula Mnguni, uthi uMakhupe ngumama owalwisana lomkhuhlane wemvukuzane yebele sikhathi sinye elwela ilungelo kwezombusazwe.

Khuphe, Tsvangirai loChamisa
Khuphe, Tsvangirai loChamisa

“Ngumama oqinileyo kakhulu olesibindi walweisa icancer waze wayinqoba, ngikhuluma kunje mnyaka yonke senza imikhankaso yokulwisana lecancer. Kupolitics bamlwisile kakhulu kodwa yena ubetshengisa isibindi, bamlwisile bazama ukuthi ehle kungene uChamisa kodwa yena ukwalile lokho.”

UNkosazana Khupe ngomunye wabomama ababalelwa kulabo abasebenze bekhokhela ngobuqotho hatshi kwele Zimbabwe kuphela kodwa phakathi kwezwekazi laseAfrica. Imisebenzi yakhe igoqela imikhankaso yokwehlisa inani labantwana labomama abalahlekelwa ngumpefumulo ngokuswela usizo ezibhedlela. Usebenze njalo ngesikhathi engumsekeli wenhloko kahulumende okweminyaka emine ilizwe libuswa ngumanyano oweZanu PF lamacele amabili awe MDC ayekhokhelwa nguTsvangirai kanye loArthur Mutambara loMnu. Welshman Ncube.

Olunye uhlelo asebenze kulo ngolwe Zimbabwe Mining Transparency Initiative ekhangele ezokwenjiwa ukuthi zingaphathwa njani ukuze ilizwe lithuthukiswe. Usungule njalo inhlanganiso eye Thokozani Khuphe Cancer Foundation ngomnyaka ka 2012 ngemva kokubanjwa umkhuhlane wemvukuzane yebele.

Imbali kaNkosazana Thokozani Khupe
please wait

No media source currently available

0:00 0:05:29 0:00

Facebook Forum

XS
SM
MD
LG