Unkosikazi Mujuru owayesaziwa empini yokulwela inkululeko ngelokuthi ‘Teurai Ropa Nhongo’ uzelwe esabelweni se Mt Darwin mhla ziku 15 Mabasa ngomnyaka ka 1955.
UMujuru walandela inengi ngesikhathi sempi waquma umngcele wangena kweleZambia eleminyaka elitshumi lasitshiyagolombili. Ngesikhathi esegangeni ecendisa ekulweni impi yenkululeko, ngomnyaka ka 1975, wayesekhethwe ukuthi akhokhele amaqembu ababesilwa impi, efundisa abanye ngezebutho lezombusazwe.
Kwathi eseleminyaka engamatshumi amabili lane, uMujuru nguye owasengumkhokheli wenkamba yeChimoio military and refugee camp eMozambique.
Waphakama wayenziwa omunye wabakhokheli abasefazane kucele elalisilwa lingaphansi kwebandla leZANU PF, ele ZANLA forces.
Ngomnyaka ka 1977, uMujuru watshada lomkakhe umuyi umnunzana Solomon Mujuru, yena owaye ngomunye wama khomanda awe ZANLA.
Umnunzana Mujuru owayehlonitshwa phakathi kweZANLA, wayesaziwa ngegama elithi Rex Nhongo empini.
Ngomnyaka atshada ngayo unkosikazi Mujuru wakhethwa ukuthi abe lilunga lekhomithi laphezulu lebandla leZANU PF.
Unkosikazi Mujuru wazithwala esempini, lapho inkamba yabo eyahlaselwa khona, kwathi ngemva kwamalanga amabili, wakhululeka.
Kwathi iZimbabwe ithatha uzibuse ngo1980, uMujuru waba ngomunye wabaphiwa isikhundla sokuba ngumpathintambo wezemidlalo, esiba nguye omncinyane kuzo zonke iziphathamandla zikahulumende ngaleso sikhathi.
Inengi lizamkhumbula ngesikhathi engumphathintambo wendlela zokukhulumisana, telecommunications, esala ukunikeza umnunzana Strive Masiyiwa imvumo yokuthi aqale inkampani kamakhalekhukwini eye Econet.
Njalo wacina ethuka owayengumsekeli kamongameli, udokotela Joshua Nkomo, yena owayesekela uMasiyiwa ukuthi aphiwe imvumo yokuvula inkampani yakhe.
Kwathi ngemva kokubhubha kukamsekeli kamongameli, umnunzana Simon Muzenda ngo 2004, ibizo lika Mujuru lafakwa phambili ukuthi abangowesifazane wakuqala ukuthatha isikhundla lesi.
Amandla kamkakhe, uSolomon, njengokutshoyo ngocubungula ngezombusazwe, umnunzana Edwin Dube, abikwa afaka umfutha kowayengumongameli umnunzana Robert Mugabe owavuma ukuthi unkosikazi Mujuru abengumsekeli wakhe.
"Siyakwazi ukuthi uSolomon Mujuru wayelamandla kakhulu kuZANU PF, lokhu esithi yiKing Maker, njalo wayesesatshwa. Yikho akwancedisa ukuthi uJoice Mujuru akhwele amalele esikhundla kuhulumende. uMnangagwa nguye okwakukhangelelwe ukuthi angene, kodwa ngenxa kaSolomon, lokhu akusenzakalanga, kwangena unkosikazi Mujuru."
UMujuru wagcotshwa njengomsekeli kamongameli mhla ziku 6 Mpalakazi 2004. Ukulwisana kwaqhubekela phakathi kuZANU PF, kulwelwa ukuthi ngubani ozathatha isikhundla sika Mugabe uma engatshiya. Kwaqala ukuba lamaxhuku atshiyeneyo, abanye befuna uMujuru kukanti ngakwelinye icele kuloMnangagwa…
"Siyakhumbula ukuthi kuke kwaba lokudonselana kakhulu kuZANU PF abanye bekhangele ukuthi ngubani ozathatha isikhundla sikaMugabe. Unkosikazi Mujuru wayeqamele kakhulu kumkakhe, ngoba wayelelizwi elilalelwayo kuZANU PF. Ngakho noma nje unkosazana Mujuru wayehamba phambili, umkakhe nguye owayebonwa njengo maqhuzu."
UMujuru wayekhanya ehamba phambili elosekelo ebantwini abanengi, ukuthi abe nguye ozathatha isikhundla uMugabe engaphuma esikhundleni.
Kodwa izinto zaguquka ngokuphazima kweso, kwangena unkosikazi Grace Mugabe esitikini, noma nje wazama ukuthi yena kalamlandu…
“Unkosikazi Grace Mugabe wayetshele abantu kubi ngami, mina ngabuza ukuthi kanti lokhu kuzasinceda ngani ngoba kayisilo qiniso okwakukhulunywa.”
Lokhu kwahle kwabamgceke ukuthi uMujuru wayeseqala ukuphelelwa ngamanzi. Kwabanjalo ke wakhitshwa esikhundleni sokuba ngumsekeli mhla ziku 8 Mpalakazi 2014m kwathi ngoMabasa 2015 waxotshwa kubandla leZANU PF, esetheswa icala lokuzama ukugenqula umongameli Mugabe.
Njengo muntu owayelokhe elamadlabuzane njalo elesifiso sokuqhubeka kwezombusazwe, uMujuru wabona kungcono ukubumba ibandla lakhe, ele Zimbabwe People First (ZPF) okwakuqala empilweni yakhe ezithola ekubandla eliphikisayo.
Kodwa walilahla lelibizo ngemva kokuthi abanye bathi untshontshe igama lebandla labo, ngakho wathi yi National People's Party (NPP).
Kodwa engabe eme njani amathuba akhe kulokhetho.
"Kunzima, ngabe ukhetho lwahle lwabanjwa ngesikhathi esanda kuxotshwa, kwakugcono. Khathesi ngibona amathuba akhe esehlile, esengemuva kukaMnangangwa kanye loNelson Chamisa."
Okwakhathesi uMujuru laye ukhankasa ekucele lamabandla aphikisayo, esefake ibizo lakhe phambili ukuthi avotelwe ukuba ngumongameli weZimbabwe, isikhundla aphosa wasibamba xhaka ngesandla, engakaxotshwa kuZANU PF ngoba kwakusobala ukuthi kulesikhathi ayethandwa nguMugabe kodwa ngokufuqwa ngumkakhe uNkosikazi Grace Mugabe kwakusobala ukuthi babengasamfuni kuZanu PF okwahle kwaqala ngokuthola kwakhe isicoco sePHD uNkosikazi Mugabe laye wahle wafuna leso sicoco wasipiwa kodwa kulokuxozela abanengi besithi wenze sikhathi bani izifundo.
