amalinks wokungena

Breaking News

Imidlalo Yenguqu eyeCastle Lager PSL Ingena Kuviki Yesithupha


Imidlalo yenguqu eyeCastle Lager Premier Soccer League, ngeviki yesithupha

Iqembu lenguqu ele Highlanders lizangena emdlalweni wangeSonto lapho elizakwamukela iqembu le Hwange liphethe imiklomelo emithathu kuphela ngemva kokunqotshwa kabili laba ngutshiki lobhanqa kathathu.

Isimo lesi sesidale ukungahlaliseki kuqembu le Highlanders kulabalandeli abakhonona ngokuthi abaqeqetshi benza iphutha ekukhetheni abadlali kodwa umqeqetshi uMadinda Ndlovu uthi loba kungumlandu wakhe labasekeli bakhe ukuhetha abadlali, abalandeli labo balakho ukuletha imibono yabo kuye besebenzisa indlela eziqondileyo.

"Iqembu leli kasilo lami kalisilo likabani. Singabaqeqetshi sibathathu silemibono etshiyeneyo ngabadlali esilabo kodwa siyahlanganisa amakhanda sibonisane ukuze siphume leqembu elizadlala. Abalandeli be nxa bebona iphutha akulankinga kodwa zikhona indlela abangazisebenzisa ukuthi basiphe ukuba bona bafuna kudlale bani. Bengakwenza lokhu ngoLwesihlanu kumbe ngoLwesine ngibuye layo lapha ithimu abayifunayo ngilichasisele ukuba sidlalisa ubani lapha ngoba abanikazi beqembu betsho njalo. Engingakufuniyo yikuthi bakhulume ithimu isidlalile ngeSonto."

Iqembu le Hwange lona liqale kuhle kakhulu imidlalo yalonyaka njalo lihlezi endaweni yesibili lilemiklomelo elitshumi lambili.

Imidlalo yeviki lesithupha izaqala ngoMgqibelo lapho iqembu le Bulawayo Chiefs elizemukela khona iqembu le Yadah enkundleni yase Luveve, iqembu le Ngezi Platinum Stars lizadlala leqembu le TelOne ngase Baobab, iqembu le Black Rhinos lizangqikilana lele Triangle ngase National Sports Stadium kuthi iqembu le FC Platinum lizadibana lele Herentals ngase Mandava.

Kusenjalo kulemibiko ethi ukuphatheka kumidlalo eyokudinga intshantshu zezwekazi lase Africa sekufake iqembu le FC Platinum esimeni esokuba lingathathelwa abadlali balo ngitsho lasibi sikamqeqetshi uNorman Mapeza yena okulamahungahunga athi ufunwa liqembu le Chippa United elakwele South Africa ikanti omunye wabadlali balo uFarai Edwin Madhananga yena ubizwe liqembu le Bidvest Wits lona elifuna ukumthenga.

Kweminye imidlalo yangeSonto iqembu leDynamos lizadlala lele ZPC Kariba ngase Rufaro, iqembu le Manica Diamonds lizadlala lele Chicken Inn ngase Gibbo, iqembu le Chapungu lizadibana lele Mushowani Stars ngase Mandava, kuthi iqembu le CAPS United lizangqikilana lele Harare City ngase National Sports Stadium.

Ezemidlalo siloJoseph Njanji
please wait

No media source currently available

0:00 0:02:13 0:00

Facebook Forum

XS
SM
MD
LG