amalinks wokungena

Breaking News

'Sifuna Imisakazo Yama Community Radio Stations'


Community Radio Stations
Community Radio Stations

Izakhamizi eZansi yemaNdebeleni zikhuthaza uhulumende ukuthi avumele imisakazo yezigaba ukuthi isakaze okusemthethweni. Umsakazo weNtepe Community Radio Station usuleminyaka elitshumi ulinde invumo yokusakaza.

Kumalanga alitshumi adlulileyo eleZimbabwe limanyane lomhlaba wonke jikelele ekunanzeni usuku lwemisakazo olweWorld Radio Day. Kodwa inengi labantu kulesisabelo, ikakhulu emaphandleni, liyehluleka ukubamba amagagasi aweZimbabwe Broadcasting Corporation okudala ukuthi inengi lilalela imisakazo yaphetsheya.

Izakhamizi ezixoxe lomsakazo weStudio 7 zithi ukuswelakala kwemisakazo emaphandleni kubabisela emuva ngoba indaba ezinengi bazizwa ngelikabathi.

Izakhamizi zeNtepe sezileminyaka elitshumi zafaka isicelo kuhulumende ukuthi ziphiwe imvumo yokusakaza kodwa kuze kubelalamhlanje lumsakazo awukavunyelwa ukusakaza okusemthethweni.

UNkosazana Thandekile Ncube ngomunye wezakhamizi zeNtepe ezilinde ngamehlo abomvu lumsakazo.

“Iradio station siyayithanda siyayifuna ngoba sifuna izinto zethu zizwakale esizenzayo lathi sicele amadonation kwabanye basisize siqhubekela phambili ngoba siyabe sesizwakala emoyeni. Ukuzwakala emoyeni khona nje kuqakathekile.”

Amazwi akhe agcizelelwe nguMnu. Jabulani Moyo othi nxa kungasungulwa umsakazo kulindawo bazasizakala lalapho belahlekelwe yizifuyo ngoba imbiko izafika kuzulu ngokuphangisa.

“Siba lamaproblems esihlangana lawo kakhulu lapha silamaproblems okutshontshelwa so ukuthi kuhamba masinya emoyeni kumbe kuhulumende nxa kungaba lomsakazo kungafika masinyane loba izikhalazo zethu kuhulumende masinyane kulokuthi ngihambe ngiyebikela amapholisa kumbe ngiye ngaphi. Nxa sikufake emoyeni kuyaphangisa ukuzwakala.”

UNkosazana Simangaliso Nyadzai, esinye njalo isakhamuzi seNtepe, uthi ukusungulwa kwemisakazo yezigaba kuzavula amathuba emisebenzi kwabatsha abatshona bebhoda ezitolo bengenzi lutho.

“Ngibona engani umsakazo lo uqakathekile ngoba silabatsha abangenzi lutho. Ngakho-ke sibona engani singafaka inkinga zethu emsakazweni sizathola amadonations.”

Umqoqi wenhlelo zeNtepe Community Radio, uMnu. Mvelo Zondo, osebenza phansi kwenhlanganiso yemisakazo yezigaba eyeZimbabwe Association of Community Radio Stations, uthi sesiside isikhathi belinde impendulo evela kuhulumende.

“Ngo April izenelisa 10 years isakaza ngendlela esakaza ngayo ingela license. Singajabula kakhulu nxa singathola ilicense yokuthi sisakaze. Okwamanje kunzima ukuthi sikhankase sibili okuzwayo njengerediyo yonke eyazakalayo. Khathesi sisebenzisa indlela zokufaka imbiko kumaWhatsApp lamabulk messeges kumbe siyenze okuthiwa ngalistener clubs.”

Uphinde wathi inengi emaphandleni lisemnyameni ngokwenzakala elizweni ngenxa yokuswelakala kwemisakazo kulesisabelo.

“Lapho abakhona umsakazo wesizwe esiwuthembileyo iZBC awufiki amakhona wonke aweZimbabwe ikakhulu ngapha emhlubulweni weZansi yeMaNdebeleni balalela imisakazo yeSouth Africa leBotswana okungangokuthi izinto ezenzakalayo phezulu ezelizwe kabazazi.”

Umphathintambo obona ngokukhitshwa kwembiko kuleli, uNkosikazi Monica Mutsvangwa, uthi uhulumende uzaguqula imithetho yokusakaza njalo kuzavulwa amagagasi emisakazo yezigaba ngokuphangisa.

Lonyaka usuku lweRadio Day lunanzwe phansi kwesihloko esithi ‘Dialogue,Tolerance and Peace’, okutsho ukuthi umsakazo ungasetshenziswa ukuletha ukukhulumisana, ukuhlalisana kanye lokuthula.

Kusenjalo, inengi liphethe likhala ngendlala esemakhaya njalo licela uhulumende ukuthi angenele.

UNkosikazi Thandiwe Sibanda ukhala ngendlala esimhlasele labazukulu bakhe.

“Batshele ukuthi siyadubeka asilanto yokudla njengoba izulu kade lingani yonke into akula ezitolo akuthengeki asidli lutho siyadubeka amakhosi ethu kazame ukuthi asiphe okudliwayo siyadubeka abalungisise sibili siyadubeka.”

Loba nje uhulumende encedisa ngomumbu udubo yikuswelakala kwezitshebo okudala ukuthi abanye bavube isitshwala ngamanzi.

Udaba Esilethulelwe NguAlbert Ncube
please wait

No media source currently available

0:00 0:04:42 0:00

XS
SM
MD
LG