amalinks wokungena

Breaking News

Izisebenzi Zesibhedlela seGwanda Zilahlekelwa Yimpahla Etshele Endlini


Isakhiwo esitshe eGwanda

Izisebenzi zesibhedlela esikhulu seGwanda ezigoqela abongi lezisebenzela ezinye ingatsha zalesi sibhedlela zilahlekelwe yimpahla ebiza inkulungwane lenkulungwane zamadola ngemva kokuqamuka komlilo kusakhiwo ebezihlala kiso.

Isakhiwo esitshe eGwanda
Isakhiwo esitshe eGwanda

Umlilo otshise izindlu ezine esitezi esake sasetshenziswa njengekliniki yokwelapha umkhuhlane wofuba iTB eziduzane lerenkini yeGwanda, uqale ngesikhathi abahlala kizo bengekho besemsebenzini abanye sebeye kukhefu leKhisimusi. Ucatshangelwa ukuba ungabe udalwe yikungasebenzi kuhle kukagetsi.

Impahla etshele kusakhiwo saseGwanda
Impahla etshele kusakhiwo saseGwanda

Izakhamizi zaleliDolobho sezisole uManisipala weGwanda ngokuhlala esehluleka ukucitsha imililo osekudale ukuthi inengi lihlale lilahlekelwa yimpahla.

Impahla ezitshileyo zibalisa imbheda, amasofa, izistofu, amatafula, amakhabothi, omaqandisa, omabonakude lezinye impahla ezinengi nengi ezendlini.

UNkosazana Sizalobuhle Moyo ngomunye wabahlali kulumuzi.

Abacitshi bomlilo abe Fire Brigade behlulekile ukuthi bawucitshe okudale ukumemetheka kwawo kusiya kwezinye izindlu ezintathu.

Izakhamizi ezinye zicine zincedisana labacitshi bomlilo okudale ukukhonona kwabo besithi uManisipala waleli dolobho uyehluleka umsebenzi wakhe.

Isakhiwo esitshe eGwanda
Isakhiwo esitshe eGwanda

UMnumzana Bekezela Maduma Fuzwayo unobhala jikelele wenhlanganiso yezakhamizi zeGwanda uthi sekudingeka ukuthi uManisipala athathelwe umsebenzi wokucitsha umlilo.

IStudio 7 ayenelisanga ukuxhumana labahlali balezi zindlu kodwa imbiko ekhona iveza ukuthi bacela isibhedlela sibaphe indawo zokuphephela kukanti abanye bahlezi kuzihlobo labangane.

UManjinela wedolobho leGwanda Umnumzana Ndaba Twala uthe basaphenya ukuthi kuyini okudale lumlilo.

Kusenjalo kubikwa kulemota enkulu etshe yaphela layo ithwele isamende duzane leMbalabala kusiya kusa lamhlanje.

UManisipala wedolobho leGwanda uhlezi esolwa nguzulu ngokwehluleka ukucitsha umlilo njalo ngomnyaka ka2012 abantu abalitshumi lambili batsha baba ngumlotha eWest Nicholson engozini yokugqikilana kwezimota. Kuthi ngo2015 isitolo sakoPower Sales laso satsha saphela du abacitshi bomlilo besehluleka ukwenza umsebenzi wabo.

Udaba lokutsha kwesakhiwo seGwanda siluphiwa nguVusisizwe Mkhwananzi
please wait

No media source currently available

0:00 0:02:52 0:00


Facebook Forum

XS
SM
MD
LG