amalinks wokungena

Siyakhuphuka Isilinganiso Sababulawa Yimikhuhlane Engathelelwanayo eZimbabwe


Umkhuhlane wetshukela usumemetheka eZimbabwe.

Ngomnyaka ka 2014 abantu abangaba yisilinganiso sokungamatshumi edlula amathathu ekhulwini - 31% babikwa bebulewe yimikhuhlane engathelelwanayo.

UDokotela Rebecca Madlela, oyingcwethi kwezempilkahle, uthi imikhuhlane engathelelanwayo ithatha isikhathi eside isemzimbeni womuntu.

Omunye njalo udokotela osebenza koBulawayo ugcizelele esithi kuhlala kucatshangelwa ukuthi imkhuhlane le ihlasela kakhulu abantu abahlala emazweni athuthukileleyo kodwa khathesi lokhu sokwaguquka ngoba isimemetheka lemazweni asathuthukayo ngakho-ke kuqakathekile ukuthi uzulu athole imfundiso ngayo ukuze azwisise indlela zokuzivikela.

Isakhamuzi sako Bulawayo, uNkosikazi Cecilia Khupe, ophethwe ngumkhuhlane wezinso, uthi kumzwisa ubuhlungu kakhulu ukuthi izibhedlela ezikoBulawayo zibiza intengo ephezulu ukuze izigulane ezinjengaye zithole usizo lokwelatshwa.

Loba uhulumende weZimbabwe esehluleka ukunika abantu usizo oluqondileyo ekwelapheni imikhuhlane enjengemvukuzane yesibeletho leyebele, usethethe amanyathelo athile emizameni yokuvikela ukubonakala kwemikhuhlane le.

Kuyahlupha kakhulu ukuba imikhuhlane le ibonakale isisesibangeni esingenza umuntu ehluleke ukwelatshwa.

Kayisebenzi imitshina ezibhedlela ezinengi zikahulumende lapho okumele kwelatshwa abantu abangela mali labalemadlana.

Imikhuhlane le engathelelwanayo ibikwa ihlupha ukwelapha ikakhulu lapho isifike esibangeni esibi semikhuhlane enjengemvukuzane njalo ukwelatshwa kwayo kubiza indleko enkulu kakhulu.

Ekhuluma emhlanganweni weWHO, uMongameli Robert Mugabe uthe iZimbabwe seyaphuma leziqondiso ezilawula ukuphathwa kwemikhuhlane le engathelelanwayo lokubunjwa kwequla elizasebenza likhangele ukulwisana kanye lokuvikela imikhuhlane ebizwa ngokuthi ngama non communicable diseases (NCDs).

IZimbabwe njengamanye amazwe ikhangelele ukugcwalisa isifiso seSustainable Development Goal 3:4 esikhangela ukuthi amazwe asathuthukayo athathe amanyathelo okwehlisa isilinganiso sabantu ababulawa yimikhuhlane engathelelwanayo ngesilinganiso sokunye kokuthathu - 1/3 kusiyafika umnyaka ka2030.

Umhlangano oqoqwe ngabohlangothi lwenhlanganiso yomanyano wamazwe womhlaba eyeWorld Health Organisation owenzelwe eMontevideo kwele Uruguay ngeviki ephelileyo, unikeze amazwe womhlaba ithuba lokuxoxisana ngemikhuhlane engathelelanwayo lokuphana lamacebo ngokungenziwa ekwehliseni inane lababulawa yimikhuhlane efana lemvukuzane, owetshukela idiebetes leminye.

Facebook Forum

XS
SM
MD
LG